Connect Gujarat
ગુજરાત

તાપી જિલ્લાના આદિવાસી સમાજનું ગૌરવ, પાટી ગામની દિકરીએ એમ.એ.માં 2 ગોલ્ડ મેડલ મેળવ્યા

તાપી જિલ્લાના આદિવાસી સમાજનું ગૌરવ, પાટી ગામની દિકરીએ એમ.એ.માં 2 ગોલ્ડ મેડલ મેળવ્યા
X

કદમ અસ્થિર હો એને મંઝિલ નથી મળતી, અડગ મનના માનવીને હિમાલય પણ નથી નડતો આ કહેવતને તાપી જિલ્લાના ડોલવણ તાલુકાના અંતરિયાળ વિસ્તામાં આવેલ પાટી ગામની યોગીની છોટુભાઈ ગામીતે સાર્થક કરી બતાવી છે. પછાત વિસ્તાર અને ગરીબ ખેડૂત પરિવારની આ દિકરી આજની નારી ધારે તો કંઈ પણ કરી શકે છે, તે પુરવાર કરીને અન્ય બહેનો માટે પ્રેરણારૂપ બની છે.

તાપી જિલ્લામાં ડોલવણ તાલુકાના પાટી ગામમાં જન્મેલી યોગીની ગામીતે પોતાના ગામની પાટી ફળિયા શાળામાં પ્રાથમિક શિક્ષણ લીધુ છે. બી.એ તથા બી.એડ. મહેસાણાના કડીની સુરજબા કોલેજમાં પુરૂ કરી સરદાર પટેલ યુનિવર્સિટી, વલ્લભ વિદ્યાનગર ખાતે અનુસ્નાતક ડીગ્રી માટે પ્રવેશ મેળવ્યો હતો. જેમાં એમ.એ. ગુજરાતી વિભાગમાં શાનદાર દેખાવ કરી 2 ગોલ્ડ મેડલ મેળવીને તાપી જિલ્લા તેમજ ગામનું અને માતા-પિતાનું નામ રોશન કર્યુ છે.

તાજેતરમાં યોજાયેલ સરદાર પટેલ યુનિવર્સિટી, વલ્લભ વિદ્યાનગરના 62માં પદવીદાન સમારોહમાં યોગીની ગામીતને શિક્ષણમંત્રી ભુપેન્દ્રસિંહ ચુડાસમા તથા રાજ્ય શિક્ષણમંત્રી વિભાવરી દવેના હસ્તે ગોલ્ડ મેડલ અને પદવી પ્રમાણપત્ર એનાયત કરવામાં આવ્યા હતા. યોગિની ગામીતની આ જ્વલંત સિધ્ધી આદિવાસી સમાજની અન્ય બહેનો માટે જરૂર પ્રેરણા પુરી પાડશે. આદિવાસી ખેડૂત પરિવારની આ દિકરીએ ઘરકામ, ખેતીકામ અને પશુપાલનના કામમાં માતા-પિતાને મદદરૂપ થવાની સાથે ધઢ આત્મવિશ્વાસ અને અથાગ મહેનતથી ગોલ્ડ મેડલ મેળવા સુધીની સફર કરી આદિવાસી સમાજનું ગૌરવ વધાર્યું છે.

Next Story
Share it