નવા નીર આવતાં ર૨૧૬ દિવસ બાદ ભરૂચમાં નર્મદા નદી બે કાંઠે

રવિવારે રેડ એલર્ટ વચ્ચે મેઘરાજાએ ભરૂચ જિલ્લામાં ભારે વરસાદ તૂટી પડતા લોકોની યાતના તેમજ લાચારીનો પાર રહ્યો ન હતો. સતત ૯ દિવસથી જિલ્લામાં મેઘરાજાના મુકામ વચ્ચે નવાનીર આવતા ૨૨૧૬ દિવસ બાદ નર્મદા નદી ભરૂચમાં બે કાંઠે થતા રેવાનો નયનરમ્ય નજારો નિહાળવા વરસાદના વિરામ વચ્ચે ગોલ્ડનબ્રિજ, ઝાડેશ્વર,કેબલ બિજ, ફૂરજા અને ભાડભૂતમાં લોકોની ભારે ભીડ ઉમટી હતી.

આમોદ, જંબુસર અને હાંસોટમાંથી અત્યાર સુધી ૧૪૪૨ લોકોનું સ્થળાંતર કરાવવામાં આવ્યુ છે. છેલ્લા ૯ દિવસથી સતત વરસી રહેલા મેઘરાજા હવે ભરૂચ જિલ્લામાં ખાનાખરાબી સર્જી રહ્યા છે. ભરૂચ શહેર અને જિલ્લામાં મેઘરાજાની રમઝટ રહેતા સરદાર સરોવરના નીર માટે છેલ્લા ૬ વર્ષથી તરસી રહેલું ભરૂચ અને જિલ્લાની પ્રજા ઠેર ઠેર ઘૂંટણથી કેડસમા પાણી ભરાતા સરોવરમાં તબદિલ થઈ ગયું હતું. સતત એકધારા અનરાધાર વરસાદથી જિલ્લામાં જનજીવન અને વેપારધંધા ઠપ થઈ ગયા હોય તેવી સ્થિતીમાં આવી ગયા છે.

જૂના ભરૂચમાં સતત વરસાદનાં કારણે જર્જરીત જોખમી મકાનોના કાટમાળ ધસી પડવાનો સિલસિલો યથાવત રહ્યો છે. દર રવિવારે કતોપોર ચાર રસ્તામાં ભરાતું રવિવારી બજાર પણ બંધ રહ્યું હતું.

છેલ્લા ૨૪ કલાકમાં ભરૂચ શહેર અને જિલ્લામાં પ તાલુકાઓમાં નેત્રંગમાં ૬ ઇંચ અને હાંસોટ તાલુકામાં ૧૪ ઈંચ, ભરૂચ ૪ ઇંચ, અંકલેશ્વર ૫ ઇંચ, આમોદ ૨ ઇંચ, અને વાલિયા તાલુકામાં ૮ ઈંચ જયારે વાગરામાં ૧.૫ ઈંચ, ઝઘડિયા તાલુકામાં ૧ ઇંચ અને જંબુસર તાલુકામાં માત્ર ૮ મિમી વરસાદ અત્યાર સુધી નોંધાયો હતો. જિલ્લામાં ઢાઢર નદીએ ભયજનક સપાટી વટાવતા આમોદમાંથી ૨૪૧ લોકો, જંબુસરમાંથી ૨૫૦ અને હાંસોટમાં અતિ વરસાદનાં કારણે ૯પર લોકોનું વિવિધ અસરગ્રસ્ત ગામોમાંથી સ્થળાંતર કરાવાયું હતું.