Connect Gujarat
ગુજરાત

ભરૂચ અને અંકલેશ્વરમાં મેઘરાજાની તોફાની બેટીંગ

ભરૂચ અને અંકલેશ્વરમાં મેઘરાજાની તોફાની બેટીંગ
X

ભરૂચ અને અંકલેશ્વરમાં શુક્રવારની સવારથી શરૂ થયેલો વરસાદ શનિવારે સવાર સુધીમાં તોફાની બની ગયો હતો. વહેલી સવારથી મુશળધાર વરસાદ શરૂ થતાં જન જીવન પ્રભાવિત થયું હતું. મુખ્ય રસ્તાઓ તથા નીચાણવાળા વિસ્તારોમાં પાણી ભરાવાની શરૂઆત થતાં લોકોમાં દોડધામ મચી ગઇ હતી. નેશનલ હાઇવે સહિતના માર્ગો પર ઝીરો વીજીબીલીટીના કારણે વાહનચાલકોને વાહનો ધીમા ચલાવવાની ફરજ પડી હતી. ઠેર ઠેર પડેલા ખાડાઓના કારણે વાહનચાલકો ત્રાહિમામ પોકારી ઉઠયાં હતાં.

ભરૂચ અને અંકલેશ્વરમાં શનિવારે વહેલી સવારથી જ મેઘરાજા આક્રમક મિજાજમાં જોવા મળ્યાં હતાં. ધીમી ધારે શરૂ થયેલો વરસાદ મુશળધાર બની જતાં પાણી ભરાવાની શરૂઆત થઇ હતી. ભરૂચ શહેરની વાત કરવામાં આવે તો શહેરના મુખ્ય માર્ગો પર પાણી ભરાઇ ગયાં હતાં. કલેકટર કચેરી પાસે આવેલા અંડરપાસમાં પાણીનો ભરાવો થયો હતો. શહેરના મોટાભાગના વિસ્તારોમાં પાણીના કારણે જનજીવન પર અસર જોવા મળી હતી. અંકલેશ્વર શહેરમાં પણ મેઘરાજાનું રોદ્ર સ્વરૂપ જોવા મળ્યું હતું. આમલાખાડીના જળસ્તર વધી જતાં પીરામણ ગામનો રસ્તો બંધ કરવાની ફરજ પડી હતી. અંકલેશ્વરના હાંસોટ રોડ પર આવેલી સોસાયટીઓમાં વરસાદી પાણી પ્રવેશી જતાં લોકોના લલાટે ચિંતાની લકીરો ઉપસી આવી હતી.

એશિયાડ નગર વિસ્તાર તો શુક્રવારે રાતથી જ જળબંબાકાર બની ગયો છે. ચોમાસા પહેલાં પ્રીમોનસુન કામગીરી પાછળ લાખો રૂપિયાનો ખર્ચ કરાયો હોવા છતાં વરસાદી પાણીના નિકાલની સમસ્યા હલ થઇ ન હોવાથી લોકોને સુવિધાના બદલે અસુવિધા જ મળતાં તેમનામાં રોષ ફેલાયો છે. સતત વરસી રહેલા વરસાદના કારણે ઝીરો વીઝિબીલીટી હોવાથી રસ્તાઓ પર વાહનોને ધીમી ગતિએ હંકારવા પડી રહયાં છે અને તેમાં પણ ઠેર ઠેર પડેલા ખાડાઓ વાહનચાલકો માટે માથાના દુખાવા સમાન બની ગયાં છે. જિલ્લાના અન્ય સ્થાનો પર ખાબકેલા વરસાદના આંકડા જોઇએ તો આમોદમાં ૧ મી.મી., અંકલેશ્વરમાં ૧ ઇંચ.,ભરૂચમાં ૧૮મી.મી, હાંસોટમાં ૩ ઇંચ., વાલિયા ૩ ઇંચ.વરસાદ નોંધાવા પામ્યો છે.

Next Story
Share it