ઇ-કોમર્સ કંપની અમેઝોન પર આજથી પ્રાઇમ ડે સેલની શરૂઆત

આજે બપોરે 12 વાગ્યાથી અમેઝોન પર પ્રાઇમ ડે સેલની શરુઆત

ઇ-કોમર્સ કંપની અમેઝોન પર આજથી પ્રાઇમ ડે સેલની શરૂઆત થઇ રહી છે. 36 કલાક સુધીના આ મહાસેલમાં બધી કંપનીઓ અલગ-અલગ કેટેગરીના તેમના તમામ પ્રોડક્ટસ પર ભારે ડિસ્કાઉન્ટ અને ઓફર્સ આપશે. પ્રાઇમ ડે સેલની શરૂઆત આજે બપોરે 12 વાગે થશે જે 17 જુલાઇના રોજ 11.59 કલાકે પૂર્ણ થશે. જણાવી દઇએ કે આ સેલ અમેઝોન કંપનીના પ્રાઇમ મેમ્બર્સ માટે રહેશે.

શું હશે ઓફર્સ?

36 કલાકના આ સેલમાં 200થી વધુ બ્રાન્ડ્સના પ્રોડક્ટ્સ સસ્તી કિંમતે મળશે. તો મોટી બ્રાન્ડ્સમાં વનપ્લસ, ઇન્ટેલ, બૉસ, તોશીબા, સેમસંગ જેવી મોટી કંપનીઓના નામ શામેલ છે. આ સિવાય પણ અનેક કંપનીઓનો સમાવેશ સેલમાં કરાયો છે જેનાં પ્રોડક્ટ્સ આ ઓફરમાં ખરીદવા માટે ઉપલબ્ધ હશે. આ ઉપરાંત સેલ દરમિયાન અમેઝોન એપ પર ઘણી ક્વિઝ પણ રમાશે. ક્વિઝ જીતનારને ઇનામમાં વનપ્લસ 6 આપવામાં આવશે.

ડિસ્કાઉન્ટ કેટેગરી

અમેઝોનના પ્રાઈમ ડે સેલમાં ગ્રાહક ઘણા કેટેગરીઝના પ્રોડક્ટ્સ પર ડિસ્કાઉન્ટનો લાભ લઇ શકશે. મોબાઇલ એન્ડ એસેસરીઝ પર 40% , ઇલેક્ટ્રોનિક આઇટમ્સ પર 50% અને ઘર અને આઉટડોર માટેના જરૂરી વસ્તુઓ પર 70% સુધીની છૂટ આપવામાં આવશે. આ સાથે જ ફેશન પ્રોડક્ટ્સ પર પણ 50-80% અને બૂક્સ, મનોરંજન પ્રોડક્ટ્સ પર 70% સુધી ડિસ્કાઉન્ટ જેવી અનેક ઑફર્સ આ સેલમાં ઉપલબ્ધ છે.

સેલમાં મળી રહેલી ઑફર્સની સાથે અમેઝોન પર બે દિવસ નક્કી કરાયેલા સમય પર કેટલાક પ્રોડક્ટ્સનું ફ્લેશ સેલ પણ કરાશે. આ ઉપરાંત એચડીએફસી બેન્કના કાર્ડ્સ અથવા અમેઝોન પેથી પેમેન્ટ કરવા પર ગ્રાહકને 10% ડિસ્કાઉન્ટ મળશે. સાથે આ સેલમાં ગ્રાહકોને ડિસ્કાઉન્ટ કૂપન પણ મળશે. આ કુપન દરેક કેટેગરી માટે ઉપલબ્ધ હશે. કુપનનો ઉપયોગ કરવા માટે યુઝરને કુપન પર ક્લિક કરીને તેને કાર્ટમાં એડ કરવાનું રહેશે. જ્યારે યુઝર તમામ વસ્તુઓ સાથે ચેકઆઉટ કરશે ત્યારે ડિસ્કાઉન્ટ કૂપન અપ્લાઇ થશે અને તે અનુસાર ગ્રાહકને ડિસ્કાઉન્ટ મળશે.