સુરતમાં બનેલી હોવિત્ઝર તોપ ‘વજ્ર’ કરશે દેશના રખોપા, સૈન્યએ કર્યું સફળ પરીક્ષણ
ભારતીય સૈન્યે પોખરણ ફાયરિંગમાં ગુરુવારે સાંજે સુરતના હજીરા ખાતે લાર્સન એન્ડ ટુબ્રો નામની કંપની દ્વારા નિર્મિત હોવિત્ઝર તોપ કે-૯ વજ્ર ટીની લાંબા અંતર સુધી હુમલો કરવાની ક્ષમતાનું પરીક્ષણ કર્યું હતું. આ પહેલાંના પરીક્ષણ બાદ આ સ્વદેશી તોપમાં ૧૩ સુધારા કરાયા છે.૪૦ થી ૫૦ કિલોમીટરની રેન્જવાળી આ તોપમાંથી છ ગોળા છોડાયા હતા. તમામ ગોળાએ પોતાના લક્ષ્ય પર અચૂક પ્રહાર કર્યો હતો.
સૈન્ય સૂત્રોના જણાવ્યા પ્રમાણે મેઇક ઇન ઈન્ડિયા પ્રોગ્રામ હેઠળ આ તોપ બનાવાઈ છે. વજ્ર ખાનગી ક્ષેત્રની કંપની લાર્સન એન્ડ ટુબ્રોએ ભારતમાં જ બનાવી છે. સૈન્યે ૧૫૫ એમએમની આ હોવિત્ઝર તોપમાં પહેલા પરીક્ષણ બાદ કેટલાક ફેરફાર કરવાનું કહ્યું હતું. સુધારા બાદ આ તોપનું પરીક્ષણ પોખરણ ફાયરિંગ રેન્જમાં સેનાએ ફરી વખત કર્યું હતું.
આ તોપ ખાસ કરીને રણની પરિસ્થિતિ ધ્યાનમાં રાખ્યા બાદ તૈયાર કરાઈ છે. બહુ થોડા જ સમયમાં તેને સૈન્યમાં સામેલ કરાશે. સેનામાં સામેલ કરાયા બાદ તાકીદે તેને પિૃમી સરહદે તહેનાત કરાશે.આગામી થોડા દિવસોમાં જ આ હજીરા ખાતે કંપનીના પ્લાન્ટમાં એક કાર્યક્રમ દરમિયાન આ તોપ સૈન્યને સોંપાશે.
લાર્સન એન્ડ ટુબ્રોએ દક્ષિણ કોરિયાની કંપની ટેકવિનની સાથે મળીને આ તોપનું નિર્માણ કર્યું છે. ગુજરાતના હજીરામાં આ તોપ બનાવવાનું કારખાનું સ્થાપિત કરાયું છે. તોપમાં ૫૦% પૂરજા દેશમાં જ બનાવેલા છે.
સૈન્યે સાડા ચાર હજાર કરોડમાં ૧૦૦ તોપનો ઓર્ડર આપ્યો છે. કંપનીએ એ ઓર્ડર વૈશ્વિક સ્તરે બહાર પડાયેલા ટેન્ડરમાં રશિયન કંપનીને પછાડીને મેળવ્યો હતો. આ તોપો સૈન્યમાં સામેલ થવા સાથે સૈન્ય પાસે હોવિત્ઝર તોપની અછત ઘણેક અંશે દૂર થઈ જશે.
