ઈસરો પ્રાઇવેટ કંપનીઓની મદદથી તૈયાર કરેલ સેટેલાઇટ લોન્ચ કરશે
અંતરિક્ષ ક્ષેત્રે કાર્યરત ભારતીય કંપનીઓ માટે ગુરુવારનો દિવસ મહત્વનો રહેશે. કારણ કે ઇસરો (ઇન્ડિયન સ્પેસ રિસર્સ ઓર્ગેનાઇઝેશન)એ પહેલીવાર ખાનગી કંપનીઓ સાથે સહકાર સાધીને ઉપગ્રહ લોન્ચ કરશે. આ સેટેલાઇટનું નામ આઇ.આર.એન.એસ.એસ. 1 એચ છે. શ્રીહરિકોટા સ્થિત કેન્દ્રમાંથી સાંજે 6.59 વાગ્યે આ ઉપગ્રહ લોન્ચ કરવામાં આવશે. ઉપગ્રહ પી.એસ.એલ.વી-સી-39રોકેટ દ્વારા ભ્રમણ કક્ષામાં તરતો મુકાશે.
ઇન્ડિયન રિજનલ નેવિગેશન સેટેલાઇટ સિસ્ટમનો આઠમો ઉપગ્રહ છે. 1425 કિગ્રા વજનનો આ ઉપગ્રહ આઇ.આર.એન.એસ.એસ-1નું સ્થાન લેશે. જૂના ઉપગ્રહની પરમાણુ ઘડિયાળ કામ કરતી અટકી ગઈ છે. ઇસરોના જણાવ્યા પ્રમાણે આ પહેલીવાર ખાનગી કંપનીઓ સાથે સહકાર સાધવામાં આવ્યો છે.
આઇઆરએનએસએસ-1 એચના નિર્માણમાં ખાનગી કંપનીઓનો 25 ટકા હિસ્સો છે. આ અગાઉ ઉપગ્રહના નિર્માણમાં ખાનગી કંપનીઓની મદદ માત્ર હાર્ડવેર, સૉફ્ટવેર પાર્ટ્સ અને જરૂરી સામગ્રી પૂરી પાડવા પૂરતી મર્યાદિત હતી.