ભરૂચ : જંબુસર પાલિકાના સુએઝ ટ્રીટમેન્ટ પ્લાન્ટની લાઇનમાં ભંગાણ, પ્રદૂષિત પાણી તળાવમાં ફરી વળતાં 50થી વધુ પશુઓના મોત

ભરૂચ જિલ્લાના જંબુસર નગરપાલિકાના બની રહેલા સુએઝ ટ્રીટમેન્ટ પ્લાન્ટની પાઇપલાઇનમાં લીકેજ થતાં પ્રદૂષિત પાણી ખાનપુરના તળાવમાં ભળી રહ્યું છે, ત્યારે આ તળાવનું પ્રદૂષિત પાણી પીતા 50થી વધુ પશુઓના મોત થતાં આક્ષેપ સાથે પશુપાલકોમાં રોષ જોવા મળી રહ્યો છે. તો સાથે જ પશુપાલકોએ વળતર ચૂકવવાની પણ જંબુસર પાલિકા પાસે માંગ કરી છે.

જંબુસર તાલુકાના ખાનપુર ગામ નજીક જંબુસર નગરપાલિકા દ્વારા સુએજ ટ્રીટમેન્ટ પ્લાન્ટનું નિર્માણ કાર્ય ચાલી રહ્યું છે. જોકે, આ કામગીરી હજુ અધૂરી છે. સાથે દૂષિત પાણી કે જેના વહન માટે પાઇપલાઇનમાં પણ નાખવામાં આવી છે, ત્યારે આ પાઇપલાઇનમાં લીકેજ થતું હોવાથી પાલિકા વિસ્તારનું પ્રદૂષિત પાણી નજીકની જમીન અને તળાવમાં ભળી રહ્યું છે. છેલ્લા એક સપ્તાહથી આ ગામના પશુપાલકોના દુધાળા પશુઓ આ દૂષિત પાણીને આરોગી મોતને ભેટી રહ્યા હોવાના આક્ષેપો થઈ રહ્યા છે. ખાનપુર ગામ ખાતે રહેતા ગામના પશુપાલકોના અંદાજે 55 જેટલા નાના-મોટા પશુઓ તબક્કાવાર મૃત્યુ પામતા પશુપાલકો મુશ્કેલીમાં મુકાયા છે, ત્યારે હવે દૂષિત પાણીના કારણે પશુઓના મોત થયા હોવાથી પશુપાલકો દ્વારા જંબુસર નગરપાલિકા પાસે વળતરની માગણી કરવામાં આવી છે.