ભાવનગર : મતદાન જાગૃતિ અર્થે 7 શિક્ષકોએ 4 કલાકની ભારે જહેમત સાથે બનાવ્યું EVMનું આબેહૂબ રેત ચિત્ર, આપ પણ જુઓ...
આગામી સમયમાં યોજાનાર ભાવનગર મહાનગરપાલિકા, તાલુકા પંચાયત, જિલ્લા પંચાયત તથા નગરપાલિકાઓની ચૂંટણીમાં મતદારોમાં મતદાન સંદર્ભે જાગૃતિ વધે તેમજ યુવા મતદારો મતદાન કરવા પ્રેરિત થાય તે હેતુથી ભાવનગરના શિક્ષકોએ રાજ્યની સૌપ્રથમ એવી સેન્ડ આર્ટની મદદથી રેત ચિત્ર બનાવવાની પ્રશંસનીય પહેલ કરી છે. જેમાં ભાવનગરના શિક્ષકોએ કોળિયાકના દરિયાકાંઠે સતત 4 કલાકની જહેમત બાદ ઇ.વી.એમ. મશીનનું આબેહૂબ સેન્ડ આર્ટ રેત ચિત્ર તૈયાર કરી દરિયાકાંઠે ઉપસ્થિત સહેલાણીઓના નિદર્શન અર્થે મુકયું હતું. આ રેત ચિત્રને ૧૦ હજારથી પણ વધુ લોકોએ નિહાળ્યું હતું અને મતદાન સંદર્ભે જરૂરી માર્ગદર્શન મેળવી માહિતગાર થયા હતા.
ભાવનગર તથા સમગ્ર રાજ્યમાં સૌપ્રથમ વખત ઇ.વી.એમ.નું રેત ચિત્ર તૈયાર કરી ભાવનગર શિક્ષણ વિભાગ દ્વારા મતદાન જાગૃતિની દિશામાં એક અનુકરણીય પહેલ કરવામાં આવી હતી. સાથે સાથે કોળિયાક ખાતે મતદાન જાગૃતિ કાર્યક્રમ હેઠળ સિગ્નેચર કેમ્પઈનનું પણ આયોજન કરવામાં આવ્યું હતું. જેમાં એક હજારથી પણ વધુ લોકો પોતાના હસ્તાક્ષર કરી મતદાન કરવા સંકલ્પબદ્ધ થયા હતા. આ કાર્યક્રમને સફળ બનાવવા જિલ્લા શિક્ષણાધિકારી એન.જી.વ્યાસ, એજ્યુકેશન ઇન્સ્પેકટર એમ.આર.પાંડે, ચિત્રકાર અશોક પટેલ તથા તેમની ટીમે ભારે જહેમત ઉઠાવી હતી.
