આજે છે ઇલિયાના ડીક્રુઝનો જન્મદિવસ; અભિનેત્રીને ઊંઘમાં ચાલવાની હતી બીમારી

તેલુગુ ફિલ્મ ઈન્ડસ્ટ્રીથી બોલિવૂડમાં પદાર્પણ કરનાર અભિનેત્રી ઈલિયાના ડીક્રુઝનો જન્મ 1 નવેમ્બર 1986ના રોજ થયો હતો. આ વર્ષે ઇલિયાના તેનો 35મો જન્મદિવસ ઉજવવા જઈ રહી છે. ઇલિયાનાની ગણતરી બોલિવૂડની સૌથી સુંદર અભિનેત્રીઓમાં થાય છે. મુંબઈમાં જન્મેલી ઈલિયાના ગોવા અને મુંબઈમાં મોટી થઈ છે. ઇલિયાનાને નાનપણથી જ મોડેલિંગ અને એક્ટિંગમાં રસ હતો. તેના જન્મદિવસ પર તેની સાથે જોડાયેલી કેટલીક વાતો જાણો.

ઇલિયાનાએ વર્ષ 2006માં તેલુગુ ફિલ્મ 'દેવદાસુ'થી પોતાના કરિયરની શરૂઆત કરી હતી. આ પછી, ઇલિયાનાએ સતત ઘણી ફિલ્મોમાં કામ કર્યું. તેલુગુ બાદ ઈલિયાનાએ તમિલ ફિલ્મ ઈન્ડસ્ટ્રીમાં પણ ઝંપલાવ્યું. દક્ષિણ ભારતીય ફિલ્મોની ટોચની અભિનેત્રીઓમાં સ્થાન મેળવ્યા બાદ, ઇલિયાનાએ પણ બોલિવૂડમાં પોતાનો હાથ અજમાવ્યો અને અહીં પણ તેની ખૂબ ચર્ચા થઈ.

ઇલિયાનાએ વર્ષ 2012માં ફિલ્મ 'બરફી'થી બોલિવૂડમાં એન્ટ્રી કરી હતી. આ ફિલ્મમાં ઇલિયાના સાથે પ્રિયંકા ચોપડા અને રણબીર કપૂર જોવા મળ્યા હતા. આ ફિલ્મને દર્શકોએ ખૂબ પસંદ કરી હતી. ઉપરાંત, ઇલિયાનાએ તેની પહેલી જ બોલિવૂડ ફિલ્મથી ચાહકોનું દિલ જીતી લીધું હતું. આ ફિલ્મ માટે ઇલિયાનાને 'બેસ્ટ ડેબ્યૂ એક્ટ્રેસ ફીમેલ'નો એવોર્ડ પણ મળ્યો હતો. તે જ વર્ષે ઇલિયાના વરુણ ધવન સાથે ફિલ્મ 'મેં તેરા હીરો'માં પણ જોવા મળી હતી.

ઇલિયાનાએ પણ તેના બ્રેકઅપને લઈને ઘણી હેડલાઈન્સ બનાવી હતી. ઇલિયાના અને તેના બોયફ્રેન્ડ વચ્ચે કોઈ વાતને લઈને ઝઘડો થયો હતો. ઝઘડા પછી બંનેમાંથી એકેય સમાધાન માટે રાજી ન થયા અને આ સંબંધ ત્યાં જ તૂટી ગયો. બ્રેકઅપ બાદ ઇલિયાના પણ ખૂબ જ પરેશાન હતી. તેમના બ્રેકઅપના થોડા સમય બાદ ઇલિયાનાએ કહ્યું હતું કે તે કોઈ બીમારી સામે ઝઝૂમી રહી છે. તેણે સોશિયલ મીડિયા પોસ્ટ પર લખ્યું કે તેને ઊંઘમાં ચાલવાની બીમારી છે. જેના કારણે તેના પગમાં ઘા વાગી જતા હતા.

ઇલિયાનાની મુખ્ય ફિલ્મો - ઇલિયાના ડીક્રુઝે બોલિવૂડમાં ઘણી ફિલ્મો કરી છે. જેમાં 'મેં તેરા હીરો', 'રુસ્તમ', 'બરફી', 'ફટા પોસ્ટર નિકલા હીરો', 'પાગલપંતી', 'મુબારકાં', 'રેઇડ', 'હેપ્પી એન્ડિંગ'નો સમાવેશ થાય છે. ઈલિયાનાએ વરુણ ધવન, અજય દેવગન, અક્ષય કુમાર, રણબીર કપૂર જેવા ફિલ્મ ઈન્ડસ્ટ્રીના મોટા સ્ટાર્સ સાથે ફિલ્મો કરી છે.