Connect Gujarat
ગુજરાત

ભાવનગરનું કર્મઠ દંપતિ : કોરોના કાળમાં ઉત્કૃષ્ટ કામગીરી કરનાર પતિ-પત્નીને સન્માનિત કરાયા

ભાવનગરનું કર્મઠ દંપતિ : કોરોના કાળમાં ઉત્કૃષ્ટ કામગીરી કરનાર પતિ-પત્નીને સન્માનિત કરાયા
X

ભાવનગરના દંપતિ ડૉ. દીપલ જોષી અને જીગ્નેષ જોષીએ સરકારી અધિકારી હોવા છતાં લોકોની સંવેદના સાથે જોડાઇ પોતાના સેવાભાવથી એક સાચો કર્મયોગી કેવો હોઇ શકે તેની એક આગવી મિશાલ પ્રસ્તુત કરી છે.

ડૉ. દીપલ જોષી હાલમાં ઘોઘા તાલુકાના ભૂંભલી ખાતે મેડિકલ ઓફિસર તરીકે ફરજ બજાવે છે. તો તેમના પતિ ભાવનગર ખાતે નાયબ કાર્યપાલક ઇજનેર તરીકે સરિતા માપક પેટા વિભાગમાં ફરજ બજાવે છે. ડૉ. દીપલે કોરોના કાળ દરમિયાન પોતે સગર્ભા હોવા છતાં કોરોનાગ્રસ્ત લોકોની સતત સેવા કરી હજારો દર્દીઓની સેવા-સુશ્રુષા કરી હતી. તેમના ત્યાગ, બલિદાન અને સમર્પણભાવ માટે તેમને ભાવનગર કલેક્ટર અને જિલ્લા વિકાસ અધિકારીના હસ્તે સમ્માનિત કરવામાં આવ્યા હતા. તેમણે લોકોને વધુને વધુ રસી લે તે માટે પ્રોત્સાહિત કર્યા હતા.

કોરોના દરમ્યાન લોકોના ટેસ્ટ કરતાં રહી લોકોને કોરોના જેવા ભયંકર રોગચાળામાંથી ઉગરવામાં મદદ કરી હતી. તેમની આ કામગીરીને ધ્યાનમાં લઇને સમગ્ર ભાવનગર જિલ્લામાંથી આરોગ્ય ક્ષેત્રે રાજ્ય કક્ષાએ તેમની પસંદગી કરવામાં આવી હતી. તેમની આરોગ્ય ક્ષેત્રની આ યશસ્વી કામગીરી માટે ગુજરાત રાજ્ય મહિલા આયોગ દ્વારા ગાંધીનગર જિલ્લાના કલોલ ખાતે યોજાયેલ કાર્યક્રમમાં 'મહિલા શક્તિ એવોર્ડ'થી સન્માનિત કરવામાં આવ્યા હતા.

ગુજરાત રાજ્ય મહિલા આયોગના ચેરમેન લીલા અંકોલિયા અને રાષ્ટ્રીય મહિલા આયોગના ચેરમેન રેખા શર્માના હસ્તે તેમને 'મહિલા શક્તિ એવોર્ડ'થી નવાજવામાં આવ્યા હતા. તેમના પતિ જીગ્નેશ જોશી પણ આ બાબતે પાછળ નથી. ચૂંટણી તેમજ મતદાન સુધારણાં કાર્યક્ર્મ દરમિયાન ખંત અને નિષ્ઠાપૂર્વક કામગીરી બજાવવાં માટે તેમનું પણ ભાવનગર કલેકટર દ્વારા બેસ્ટ સેક્ટર ઓફિસર તરીકે સન્માન કરવામાં આવી ચૂક્યું છે.

ભાવનગરના ભાલ વિસ્તારમાં ચોમાસાની ઋતુમાં પાણી ભરાવાની સમસ્યા ઉકેલ માટે ભાલ પંથકમાં એક અલાયદી કેનાલનો માર્ગ તૈયાર કરીને પાણી ભરાવાની સમસ્યામાંથી કાયમી મુક્તિ અપાવતું કાર્ય તેમણે કર્યું છે. ભાલ વોટર લોગીંગ કમિટી મેમ્બર તેમજ સુજલામ સુફલામ્ યોજનાના નોડલ અધિકારી તરીકે ભાવનગરની બધા જ અગરોનો સર્વે કરી તેમજ હકીકતલક્ષી રિપોર્ટ તૈયાર કરી તેને ઇન્ટરનેશનલ જનરલ પબ્લિશ કર્યું છે. આ ઉપરાંત તેઓએ ગ્રામ્ય વિસ્તારમાં પાણી ઘુસતું અટકાવવા માટેની કામગીરી બદલ જિલ્લા વહીવટી તંત્ર દ્વારા પ્રમાણપત્ર આપી સન્માનિત કરવામાં આવ્યા છે.

Next Story
Share it