વલસાડ: NCBએ સૌથી મોટું ઓપરેશન પાર પાડી ડ્રગ્સનો મોટો જથ્થો ઝડપી પાડ્યો
85 લાખ રૂપિયા પણ મળી આવ્યા.
રાજ્યમાં નાર્કોટિક્સ કંટ્રોલ બ્યુરોએ સૌથી મોટું ઓપરેશન પાર પાડ્યું છે. વાપી-વલસાડ ખાતેથી 4.5 કિલો MD ડ્રગ્સ સાથે 2 આરોપીઓની ધરપકડ કરાઇ છે. ગુજરાતમાં સૌ પ્રથમ વખત આટલી મોટી માત્રામાં MD ડ્રગ્સનો જથ્થો ઝડપી પાડવામાં આવ્યો છે.20 કલાક જેટલું આ ઓપરેશન ચલાવવામાં આવ્યું હતું. જે દરમ્યાન 85 લાખ રોકડ રકમ પણ મળી આવી.
પોલીસે બે માસ્ટર માઈન્ડ પ્રકાશ પટેલ અને સોનું નિવાસની ધરપકડ કરી છે. મળતી માહિતી પ્રમાણે પ્રકાશ ડ્રગ્સ બનાવતો હતો અને સોનું રામ માર્કેટિંગ કરતો હતો. અત્રે મહત્વનું છે કે, લોકલ માર્કેટમાં આ MD ડ્રગ્સની કિંમત ખૂબ વધારે છે. આ કેસ બાદ MD ડ્રગ્સની આખી લાઈન પકડાઈ શકે છે. ઉલ્લેખનીય છે કે, થોડાંક દિવસ અગાઉ પણ સુરત પલસાણાના સાકી ગામેથી સવા કરોડ જેટલા કિંમતનો ગાંજો પકડાયો હતો.
અહીં આવેલા શ્રી રેસિડન્સીના બીજા માળે આવેલા ફ્લેટ નંબર 204 માંથી 1142 કિલો ગાંજો મળી આવ્યો હતો. ગ્રામ્ય એસ.ઓ.જી પોલીસે આ ઓપરેશન પાર પાડ્યું હતું. તદુપરાંત અગાઉ 175 કરોડના હેરોઈન ડ્રગ્સ મામલે મુખ્ય આરોપી સાહિદ કાસમ સુમરાની ધરપકડ કરવામાં આવી હતી. આરોપી સાહિદ કાસમ દુબઈથી દિલ્હી એરપોર્ટ ઉતરતા જ તેને ઝડપી પાડવામાં આવ્યો હતો. આ પહેલાં 5 પાકિસ્તાની નાગરીકો ઝડપાયા હતાં. તેમને મધદરિયે ગુજરાત એટીએસ અને કોસ્ટગાર્ડે ઝડપી પાડ્યાં હતાં.
