ઝારખંડને મળી મોટી ભેટ, બાબાના શહેરમાં પીએમ મોદીએ કર્યો રોડ શો, હજારો લોકો ઉમટ્યા

વડા પ્રધાન નરેન્દ્ર મોદી આજે તેમના ઝારખંડ પ્રવાસના ભાગરૂપે બાબા બૈદ્યનાથના શહેર દેવઘર પહોંચ્યા હતા. તેમણે અહીં એરપોર્ટની સાથે 16,000 કરોડ રૂપિયાથી વધુના પ્રોજેક્ટનું ઉદ્ઘાટન અને શિલાન્યાસ કર્યું. કાર્યક્રમ બાદ પીએમ મોદીએ લોકોને સંબોધિત કર્યા હતા. પીએમ મોદીએ પોતાના સંબોધનમાં કહ્યું કે બાબાના ધામમાં આવીને દરેકનું મન ખુશ થઈ જાય છે. આજે આપણને સૌને દેવઘરથી ઝારખંડના વિકાસને વેગ આપવાનું સૌભાગ્ય મળ્યું છે.

ઝારખંડમાં દેવઘર એરપોર્ટ સહિત રૂ. 16,000 કરોડથી વધુના પ્રોજેક્ટનું ઉદ્ઘાટન અને શિલાન્યાસ કર્યા પછી, વડાપ્રધાન મોદીએ રોડ શો કરીને જનતાનું અભિવાદન કર્યું. આ દરમિયાન પીએમ મોદીની એક ઝલક મેળવવા માટે હજારો લોકોની ભીડ ઉમટી પડી હતી.

પીએમ મોદીએ કહ્યું કે અમે સબકા સાથ, સબકા વિકાસ, સબકા વિશ્વાસ અને સબકા પ્રયાસના મંત્રને અનુસરી રહ્યા છીએ. ઈન્ફ્રાસ્ટ્રક્ચરમાં રોકાણ કરીને વિકાસ, રોજગાર-સ્વ-રોજગારના નવા રસ્તાઓ શોધાઈ રહ્યા છે. અમે વિકાસની આકાંક્ષા પર ભાર મૂક્યો છે, મહત્વાકાંક્ષી જિલ્લાઓ પર ધ્યાન કેન્દ્રિત કર્યું છે.

પીએમ મોદીએ કહ્યું કે આજે સરકારના પ્રયાસોના ફાયદા આખા દેશમાં દેખાઈ રહ્યા છે. UDAN યોજના હેઠળ છેલ્લા 5-6 વર્ષોમાં એરપોર્ટ, હેલીપોર્ટ અને વોટર એરોડ્રોમ દ્વારા લગભગ 70 નવા સ્થળો ઉમેરવામાં આવ્યા છે. આજે સામાન્ય નાગરિકોને 400 થી વધુ નવા રૂટ પર હવાઈ મુસાફરીની સુવિધા મળી રહી છે.

પીએમ મોદીએ કહ્યું કે મને 4 વર્ષ પહેલા દેવઘર એરપોર્ટનો શિલાન્યાસ કરવાની તક મળી હતી. કોરોનાની મુશ્કેલીઓ છતાં તેના પર ઝડપથી કામ થયું અને આજે ઝારખંડને બીજું એરપોર્ટ મળી રહ્યું છે. દર વર્ષે લગભગ 5 લાખ મુસાફરો દેવઘર એરપોર્ટથી અવરજવર કરી શકશે. તેનાથી બાબાના ભક્તોને પણ સુવિધા મળશે.