ખેડા : થર્મલમાં કિશોરના ગળામાંથી ચેઇન આંચકી ભાગ્યાં બે વ્યંઢળ, જુઓ પછી તેમના કેવા થયાં હાલ
ગળતેશ્વર તાલુકાના સેવાલિયા નજીકના થર્મલ ખાતેની નાલંદા સોસાયટીમાંથી એક કિશોરના ગળામાંથી સોનાની ચેઇનની ચોરી કરી ભાગવા જતાં રાજકોટના બે નકલી વ્યંઢળને લોકોએ ઝડપી લઇ સેવાલિયા પોલીસને સોંપી દીધાં હતાં. આ પહેલાં અસલી વ્યંઢળોએ નકલી વ્યંઢળોને મેથીપાક ચખાડયો હતો અને તેનો વિડીયો વાયરલ થઇ રહયો છે
સેવાલિયાના થર્મલ ચોકડી પાસેની નાલંદાપાર્ક સોસાયટીમાં રવિવારે સાંજના સુમારે રાજકોટ પંથકના પર્વત રાઠોડ તથા સંદિપ પરમાર વ્યંઢળનો વેશ ધારણ કરી દિવાળીની બોણી ઉઘરાવવા આવ્યાં હતા. જ્યાં બન્નેએ એક મકાનમાં પીવા માટે પાણી માગ્યું હતુ. ત્યારે ઉભેલાં કિશોરના ગળામાં સોનાની ચેઇન જોઇ બન્ને શખસે ચેન આંચકી લઇ ભાગવા માંડતા બાળકે બુમાબુમ કરી મુકતાં સોસાયટીના રહીશોએ પીછો કરી ઝડપી લીધાં હતાં.
સ્થાનિક રહીશોએ સેવાલિયા પોલીસ અને અસલી વ્યંઢળોને બોલાવી લીધાં હતા. રિક્ષામાં લાકડીઓ સાથે આવેલાં ચારેક અસલી કિન્નરોએ બન્ને નકલી વ્યંઢળો પર ધોકાવાળી કરી મેથીપાક ચખાડ્યો હતો. સરાજાહેર સ્ત્રીના વેશમાં રહેલાં અસલી કિન્નરોના હાથે થતી નકલી વ્યંઢળોની ધોલાઇને જોવા લોકો ટોળે વળ્યાં હતા.આખરે સેવાલિયા પોલીસે વચ્ચે પડી બન્ને શખસને છોડાવી પોલીસમથકે લઇ આવ્યાં હતાં.
