આજે છે 'આંતરરાષ્ટ્રીય ઓલિમ્પિક દિવસ', જાણો ક્યારથી શરૂ થઈ આ દિવસની ઉજવણી

કોરોના રોગચાળાને કારણે ગયા વર્ષે ઓલિમ્પિક રમતો મુલતવી રાખવામાં આવ્યા હતા, જે હવે આવતા મહિને ટોક્યોમાં રમાશે. તાજેતરની ઓલિમ્પિક રમતોમાં ભારતે ગયા વર્ષે 100 વર્ષોની યાત્રા પૂર્ણ કરી છે. તેમ છતાં, માનવામાં આવે છે કે ઓલિમ્પિક રમતોની શરૂઆત આશરે 2,796 વર્ષ પહેલાં ગ્રીસમાં ઝિયસના પુત્ર હેરકલેસ દ્વારા કરવામાં આવી હતી, જોકે એવું પણ માનવામાં આવે છે કે આ રમતો તેના કરતા પણ ઘણા પહેલા રમવામાં આવતી હતી.

આંતરરાષ્ટ્રીય ઓલિમ્પિક દિવસ દર વર્ષે 23 જૂને વિશ્વભરમાં ઉજવવામાં આવે છે. આ દિવસ રમત અને તંદુરસ્તીને સમર્પિત છે. આ દિવસે વિશ્વના વિવિધ ભાગોમાં વિવિધ પ્રકારના કાર્યક્રમોનું આયોજન કરવામાં આવે છે જેમાં તમામ વર્ગના લોકો અને રમતવીરો ભાગ લે છે.

આ દિવસે 1894માં આંતરરાષ્ટ્રીય ઓલિમ્પિક સમિતિની સ્થાપના થઈ. 23 જૂન 1948ના રોજ પ્રથમ વખત ઓલિમ્પિક દિવસની ઉજવણી કરવામાં આવી હતી. તે સમયે પોર્ટુગલ, ગ્રીસ, ઓસ્ટ્રિયા, કેનેડા, સ્વિટ્ઝરલેન્ડ, ગ્રેટ બ્રિટન, ઉરુગ્વે, વેનેઝુએલા અને બેલ્જિયમે પોતપોતાના દેશોમાં ઓલિમ્પિક ડેનું આયોજન કર્યું હતું.

દર વર્ષે આંતરરાષ્ટ્રીય ઓલિમ્પિક દિવસની એક અલગ થીમ હોય છે. આ વર્ષની થીમ સ્વસ્થ રહો, મજબૂત રહો, ઓલિમ્પિક ડે વર્કઆઉટ્સ સાથે એક્ટિવ રહો છે.