IPL 2022 PBKS Vs RCB : 205 રન બનાવ્યા પછી પણ RCB કેવી રીતે હાર્યું?, પંજાબની ધમાકેદાર જીતનો સંપૂર્ણ રોમાંચ વાંચો.

ઈન્ડિયન પ્રીમિયર લીગ (IPL) 2022માં રવિવારે સાંજે જબરદસ્ત મેચ રમાઈ હતી. રોયલ ચેલેન્જર્સ બેંગ્લોર (RCB) અને પંજાબ કિંગ્સ (PBKS) વચ્ચેની આ મેચમાં પંજાબનો વિજય થયો હતો. આરસીબીએ પહાડ જેવો સ્કોર 205 રન બનાવ્યો હતો પરંતુ તે પછી પણ ટીમ હારી ગઈ હતી. પંજાબ કિંગ્સે છેલ્લી ઓવરોમાં આખી મેચ કેવી રીતે ફેરવી નાખી, જાણો સમગ્ર મેચનો રોમાંચ.

પ્રથમ બેટિંગ કરતા રોયલ ચેલેન્જર્સ બેંગ્લોર (RCB)એ 205 રન બનાવ્યા હતા. આરસીબીના નવા કેપ્ટન ફાફ ડુ પ્લેસિસે ધીમી શરૂઆત બાદ ઝડપ પકડી અને 57 બોલમાં 88 રન બનાવ્યા. ફાફે પોતાની ઇનિંગમાં 7 સિક્સર ફટકારી હતી. તેના સિવાય વિરાટ કોહલીએ 29 બોલમાં 41 રન અને દિનેશ કાર્તિકે 14 બોલમાં 32 રન બનાવ્યા હતા. આ વિસ્ફોટક ઇનિંગ્સના આધારે RCBએ 20 ઓવરમાં 205 રન બનાવ્યા હતા.

પંજાબ કિંગ્સે પણ શાનદાર શરૂઆત કરી હતી અને કેપ્ટન મયંક અગ્રવાલ, શિખર ધવનની જોડીએ બેંગ્લોરના બોલરો પર તબાહી મચાવી હતી. કેપ્ટન મયંક અગ્રવાલે 24 બોલમાં 32 રન, શિખર ધવને 29 બોલમાં 43 રન બનાવ્યા હતા. ભાનુકા રાજપક્ષે પણ 22 બોલમાં 43 રન બનાવ્યા હતા. પરંતુ પંજાબ માટે ખરી રમત ઓડિયન સ્મિથ અને શાહરૂખ ખાને ફેરવી નાખી. જ્યારે પંજાબને 24 બોલમાં 44 રનની જરૂર હતી ત્યારે તે જ ઓવરમાં ઓડિયન સ્મિથનો કેચ છૂટી ગયો હતો. આ પછી પંજાબ કિંગ્સને 18 બોલમાં 36 રનની જરૂર હતી. 18મી ઓવરમાં જ ઓડિયન સ્મિથે ધૂમ મચાવી હતી અને 25 રન લૂંટી લીધા હતા. ઓડિયને આ ઓવરમાં 3 સિક્સ અને એક ફોર ફટકારી હતી. આ ઓવરમાં પંજાબની જીત નિશ્ચિત થઈ ગઈ હતી અને અંતે શાહરૂખ ખાને પણ એક સિક્સર, એક ફોર ફટકારી હતી.