IPL 2022: 36 પર 2 થી 200 પાર, શિવમ-ઉથપ્પાના તોફાની બેટિંગ, બનાવ્યા આ રેકોર્ડ.!

ઈન્ડિયન પ્રીમિયર લીગ (IPL)માં મંગળવારે ચેન્નાઈ સુપર કિંગ્સ (CSK) અને રોયલ ચેલેન્જર્સ બેંગ્લોર (RCB) વચ્ચે મેચ રમાઈ હતી. ચેન્નાઈએ આ મેચમાં પ્રથમ બેટિંગ કરીને 216 રનનો મોટો સ્કોર બનાવ્યો હતો. રોબિન ઉથપ્પા અને શિવમ દુબેએ ચેન્નાઈ માટે અજાયબીઓ કરી હતી. જેમણે સિક્સરનો એવો વરસાદ કર્યો જેણે બેંગલુરુની હાલત ખરાબ કરી દીધી હતી. ચેન્નાઈ સુપર કિંગ્સ (CSK)ની શરૂઆત સારી રહી ન હતી અને તેણે માત્ર 36 રનમાં બે વિકેટ ગુમાવી દીધી હતી. શિવમ દુબે અને રોબિન ઉથપ્પાએ સાતમી ઓવરથી ટીમની આગેવાની લીધી હતી. શરૂઆતમાં બંને થોડો સમય આરામથી રમ્યા અને સિંગલ્સ એકત્રિત કરીને ભાગીદારી બનાવવા પર ધ્યાન કેન્દ્રિત કર્યું.

ઇનિંગ્સની 10 ઓવરના અંતે ચેન્નાઈ સુપર કિંગ્સનો સ્કોર 60-2 હતો. પરંતુ તે પછી બંને બેટ્સમેનોએ પોતાના ગિયરને એ રીતે બદલ્યા કે બેંગ્લોરની ટીમ જોતી જ રહી ગઈ હતી. ચેન્નાઈ સુપર કિંગ્સે છેલ્લી દસ ઓવરમાં કુલ 156 રન બનાવ્યા હતા. જે છેલ્લી દસ ઓવરમાં બનેલો IPLનો ત્રીજો સૌથી મોટો સ્કોર છે. તે જ સમયે શિવમ દુબે અને રોબિન ઉથપ્પા વચ્ચે કુલ 165 રનની ભાગીદારી થઈ હતી જે આઈપીએલમાં ત્રીજી વિકેટ માટે સૌથી વધુ ભાગીદારી છે.