નીરજે સિલ્વર જીતીને ઈતિહાસ રચ્યો, ટૂર્નામેન્ટમાં આ મેડલ જીતનાર પ્રથમ ભારતીય બન્યો

ભારતના સ્ટાર જેવલિન થ્રોઅર નીરજ ચોપરાએ અમેરિકાના યુજેનમાં ઈતિહાસ રચ્યો હતો. તેણે રવિવારે (24 જુલાઈ) વર્લ્ડ એથ્લેટિક્સ ચેમ્પિયનશિપમાં સિલ્વર મેડલ જીત્યો હતો. આ ટૂર્નામેન્ટના ઈતિહાસમાં મેડલ જીતનાર તે પ્રથમ ભારતીય પુરૂષ એથ્લેટ બન્યો છે. આ સ્પર્ધામાં સિલ્વર મેડલ જીતનાર તે પ્રથમ ભારતીય પણ છે. તેના પહેલા અનુભવી એથ્લેટ અંજુ બોબી જ્યોર્જે 2003માં ઐતિહાસિક બ્રોન્ઝ મેડલ જીત્યો હતો. નીરજે ચોથા રાઉન્ડમાં 88.13 મીટરના ભાલા ફેંક સાથે સિલ્વર મેડલ મેળવ્યો હતો.

ઓલિમ્પિક ચેમ્પિયન નીરજ ચોપરા પ્રથમ પ્રયાસમાં નિષ્ફળ રહ્યો હતો. તેના પ્રથમ થ્રોને ફાઉલ જાહેર કરવામાં આવ્યો હતો. ત્યાર બાદ ચોપરાએ બીજા રાઉન્ડમાં 82.39 મીટર દૂર બરછી ફેંકી હતી. નીરજના હરીફ ગ્રેનાડાના એન્ડરસન પીટર્સે પ્રથમ પ્રયાસમાં 90.21 મીટર અને બીજા રાઉન્ડમાં 90.46 મીટર બરછી ફેંકીને નીરજ પર દબાણ બનાવ્યું હતું. આ પછી નીરજે ત્રીજા અને ચોથા રાઉન્ડમાં સતત પોતાના પ્રદર્શનમાં સુધારો કર્યો હતો. તે ત્રીજા રાઉન્ડમાં 86.37 મીટર અને ચોથા રાઉન્ડમાં 88.13 મીટર ફેંકવામાં સફળ રહ્યો હતો. નીરજ પાંચમા રાઉન્ડમાં નિષ્ફળ ગયો હતો. પીટર્સ 90.54 મીટરના ભાલા ફેંક સાથે ગોલ્ડ મેડલ જીતવામાં સફળ રહ્યો. ચેક રિપબ્લિકના જેકબ વાડલેજ 88.09ના સ્કોર સાથે બ્રોન્ઝ જીતવામાં સફળ રહ્યા.

સ્પર્ધામાં નીરજે તેના પ્રથમ પ્રયાસમાં 88.39 મીટરનું અંતર કાપ્યું અને ફાઇનલમાં જગ્યા બનાવી. બીજી તરફ રોહિતે 80.42 મીટરનું અંતર કાપ્યું હતું. નીરજ અને રોહિત બંને ક્વોલિફાઈંગ રાઉન્ડનો સ્કોર પાર કરી શક્યા ન હતા. જોકે નીરજે સિલ્વર જીત્યો હતો, પરંતુ રોહિતને ખાલી હાથે પરત ફરવું પડ્યું હતું.