ટીમ ઈન્ડિયાના નવા હેડ કોચ બન્યા રાહુલ દ્રવિડ, ન્યૂઝીલેન્ડ સામેની સીરીઝમાં સંભાળશે ચાર્જ

'ધ વોલ'ના નામથી જાણીતા રાહુલ દ્રવિડને ટીમ ઈન્ડિયાના નવા હેડ કોચ બનાવવામાં આવ્યા છે. રાહુલ દ્રવિડ આગામી ન્યૂઝીલેન્ડ શ્રેણીમાંથી સિનિયર ટીમની કોચિંગ જવાબદારી સંભાળશે. BCCIએ બુધવારે રાત્રે એક નિવેદનમાં આ વાત કહી હતી. ટી-20 વર્લ્ડકપ બાદ ટીમ ઈન્ડિયાના હાલના મુખ્ય કોચ રવિ શાસ્ત્રી પોતાનું પદ છોડી રહ્યા છે.

દ્રવિડ હાલમાં નેશનલ ક્રિકેટ એકેડેમી (NCA)ના પ્રમુખ છે. BCCIના અધિકારીએ શુક્રવારે રાત્રે IPL ફાઈનલ દરમિયાન મીડિયાને જણાવ્યું હતું કે, રાહુલ દ્રવિડ ભારતીય ટીમના મુખ્ય કોચ બનશે. તેઓ ટૂંક સમયમાં NCAના અધ્યક્ષ પદેથી રાજીનામું આપશે. દ્રવિડ સાથે ઘણા વર્ષોથી કામ કરી રહેલા પારસ મ્હમબ્રેની બોલિંગ કોચ તરીકે નિમણૂક કરવામાં આવી છે. તે ટીમના ભાગ રૂપે ભરત અરુણનું સ્થાન લેશે.

ફિલ્ડિંગ કોચ આર શ્રીધરની બદલી અંગે કોઈ નિર્ણય લેવામાં આવ્યો નથી. વિક્રમ રાઠોડ ટીમના બેટિંગ કોચ તરીકે ચાલુ રહેશે. દ્રવિડ થોડા દિવસ પહેલા શ્રીલંકા પ્રવાસમાં ટીમ ઈન્ડિયાના કોચ હતા.