સુરત: આ વર્ષે ઉત્તરાયણમાં ફીરકી-પતંગની સાથે રંગબેરંગી ફુગ્ગાઓની રહી બોલબોલા
સૂર્ય એક રાશીમાંથી બીજી રાશીમાં સ્થાનાંતર કરે તેને સંક્રાંતિ કહે છે. સૂર્ય ધનુ રાશી માંથી મકર રાશીમાં સ્થાનાંતર કરે છે. ત્યારે મકરસંક્રાંતિ શરૂ થાય છે આ સમયે સૂર્ય પૃથ્વી આજુબાજુની પોતાની પરિભ્રમણની દિશામાં પણ પરિવર્તન કરી થોડોક ઉત્તર દિશા તરફ ખસે છે. આમ, સૂર્ય ઉત્તર તરફ ખસતો હોવાથી આ દિવસને ઉત્તરાયણ તરીકે ઓળખવામાં આવે છે.
ઉત્તરાયણમાં દર વર્ષે પતંગો તો દેખાય જ છે પરંતુ આ વર્ષે પતંગોની સાથે સાથે રગબેરંગી ફુગ્ગાઓનો ક્રેઝ લોકોમાં વધુ જોવા મળ્યો, સુરતમાં ફીરકી-પતંગની સાથે રંગબેરંગી ફુગ્ગાઓની બોલબાલા રહી હતી.
સરકારે તુક્કલ પર પ્રતિબંધ મૂક્યો ત્યારથી મકરસંક્રાંતિના તહેવાર પર પતંગ રસિયાઓ પતંગ-ફીરકી સાથો સાથ હવે રંગેબેરંગી ફુગ્ગાઓની ખરીદી કરી રહ્યા છે. આજે વહેલી સવારે મકરસંક્રાંતિના પર્વ ઉપર રોજ કિમ માંડવી રોડ પર પણ રંગેબેરંગી ગેસ ભરેલા ફુગ્ગાઓના વેચાણે જોર પકડ્યું હતું. આ માર્ગ પર ફુગ્ગાઓની ખરીદી કરવા રસિયાઓ સવારથી પહોચી ગયા હતા.ગેસ ભરેલા ફુગ્ગાઓમાં નાના બાળકો માટે ડોરેમોન,પોપટ,માછલી જેવા ફુગ્ગાઓ એ આકર્ષણનું કેદ્ર ઉભું કર્યું હતું.
જાણો, મકરસંક્રાંતિના પર્વનું શું છે મહત્વ :
મકરસંક્રાંતિનો મહત્વપુર્ણ સમય, પરિવર્તનનો, જુનું તજી અને નવું અપનાવવાનો સમય છે. ગુજરાતમાં આ સમયે છડેલા ધાન્યની અને તલની મિઠાઇઓ, ખાધ પદાર્થો બનાવી અને દાન કરવામાં આવે છે. ગુજરાતમાં આ દિવસે ઘઉં, બાજરી કે જુવારને છડીને તેનો ખીચડો બનાવવામાં આવે છે, બહેન-દિકરી તથા અન્ય લોકોને ખીચડો ખવડાવવાથી પુણ્ય મળે છે તેવી માન્યતા ગુજરાતીઓમાં પ્રવર્તે છે આ ઉપરાંત ઘઉંની ધુધરી કરીને ગાયોને ખવડાવવામાં આવે છે.
ભારતનાં અન્ય પ્રાંતોમાં આજનાં દિવસે માલિક પોતાનાં નોકરોને અન્ન,વસ્ત્ર અને ધન વગેરે સામગ્રી દાન-ભેટ સ્વરૂપે આપે છે.મકરસંક્રાંતિનાં પછીનાં દિવસે પશુ-પ્રાણીઓ,ખાસતો ગાયને પણ યાદ કરાય છે.નાની બાળાઓનાં હસ્તે પશુ,પક્ષી અને માછલીઓને ભોજન ખવડાવાય છે.આ દિવસે યાત્રા-પ્રવાસ કરવો અનુચિત મનાય છે,કારણકે આ દિવસ કુટુંબ-પરિવારનાં મિલન અને પરિવાર માટે સમર્પણનો છે.આ દિવસે ગુરુજનો પોતાનાં શિષ્યોને આશિષ આપે છે.
