હવાઈ મુસાફરીનો ખર્ચ થશે મોંઘો, જેટ ઈંધણના ભાવમાં સતત 10મી વખત વધારો થયો..!

હવાઈ મુસાફરી કરતા મુસાફરો માટે ખરાબ સમાચાર છે, હકીકતમાં તેમનો પ્રવાસ ખર્ચ વધવા જઈ રહ્યો છે. ઓઈલ માર્કેટિંગ કંપનીઓએ ફરી એકવાર જેટ ઈંધણના ભાવમાં વધારો કર્યો છે. આ વર્ષે સતત દસમી વખત ATFના ભાવમાં વધારો કરવામાં આવ્યો છે. કંપનીઓએ તેની કિંમતમાં પ્રતિ કિલોલિટર પાંચ ટકાનો વધારો કર્યો છે. દેશભરમાં પેટ્રોલ અને ડીઝલના ભાવ સ્થિર છે તો બીજી તરફ એર ટર્બાઇન ફ્યુઅલ એટીએફના ભાવમાં વધારો અટકવાનું નામ નથી લઈ રહ્યો.

જેટ ઈંધણની કિંમતમાં 6,188 રૂપિયા પ્રતિ કિલોલીટરનો વધારો કરવામાં આવ્યો છે. નવા દરો 31 મે 2022થી લાગુ થશે. અગાઉ જેટ ફ્યુઅલની કિંમતમાં માર્ચ મહિનામાં 18.3 ટકા અને એપ્રિલ મહિનામાં 2 ટકાનો વધારો કરવામાં આવ્યો હતો. આ તાજેતરના વધારા પછી, દિલ્હીમાં નવી ATF કિંમત 1,16,852 રૂપિયા પ્રતિ કિલોલીટરથી વધીને 123039.71 રૂપિયા પ્રતિ કિલોલીટર થઈ ગઈ છે.

તે જ સમયે તે મુંબઈમાં 121847.11 રૂપિયા પ્રતિ કિલોલિટર, કોલકાતામાં 127854.60 રૂપિયા પ્રતિ કિલોલિટર અને ચેન્નાઈમાં 127286.13 રૂપિયા પ્રતિ કિલોલિટર પર પહોંચી ગયો છે. આ વર્ષની શરૂઆતથી જ જેટ ફ્યુઅલની કિંમતમાં મોટો વધારો કરવામાં આવ્યો છે. રિપોર્ટ અનુસાર જાન્યુઆરી 2022 થી તેની કિંમતમાં 61.7 ટકાનો વધારો થયો છે. 1 જાન્યુઆરી, 2022ના રોજ તેની કિંમત 76,062 રૂપિયા પ્રતિ કિલોલીટર હતી,

જે અત્યાર સુધીમાં વધીને 46,938 રૂપિયા પ્રતિ કિલોલીટર થઈ ગઈ છે. અહીં જણાવી દઈએ કે એરક્રાફ્ટ ઈંધણની કિંમતોમાં ફેરફાર મહિનામાં બે વાર 1લી અને 16મી તારીખે કરવામાં આવે છે. કોઈપણ એરલાઈનના સંચાલન ખર્ચમાં જેટ ઈંધણનો હિસ્સો 40 ટકા છે. આંતરરાષ્ટ્રીય સ્તરે કાચા તેલની કિંમતમાં વધારો તેની કિંમત પર પણ અસર કરે છે. આવી સ્થિતિમાં, સતત વધારાને કારણે, હવાઈ મુસાફરી મોંઘી થવાની સંભાવના છે.