વલસાડ : કોરોના પોઝિટિવ કેસ ધરાવતા વિસ્તારમાં એ.પી. સેન્ટર અને કન્ટેન્મેન્ટ એરીયા જાહેર કરાયા
વલસાડ જિલ્લાના વિવિધ વિસ્તારોમાં કોરોના પોઝિટિવ કેસો જણાતાં વાઇરસના ઝડપી સંક્રમણને ધ્યાને લેતાં લોકોની સુરક્ષા બાબતે તકેદારીના પગલારૂપે જિલ્લા મેજિસ્ટ્રેટ આર.આર.રાવલે એપેડેમીક ડીસીઝ એકટ અન્વયે તેમને મળેલી સત્તાની રૂએ એ.પી.સેન્ટર અને કન્ટેન્મેન્ટ ઝોન નક્કી કરી તાત્કાલિક અસરથી તા. ૧૮/૦૩/૨૦૨૧ સુધી આ વિસ્તારોને ચારે બાજુથી સીલ કરી તેમાં બહાર કે, અંદરની અવર-જવર ઉપર સંપૂર્ણ પ્રતિબંધ મૂકયો છે.
વલસાડ શહેરમાં જે અનુસાર એ.પી. સેન્ટર તરીકે જાહેર થયેલા વિસ્તારોમાં પારડી નગરપાલિકા વિસ્તારના જલારામનગર, સ્વાધ્યાય મંડળ ખાતે આવેલ મકાન, વલસાડ નગરપાલિકા વિસ્તારના અબ્રામા, ધારાનગર, સાંઇદર્શન એપાર્ટમેન્ટ-૨ તેમજ વલસાડ તાલુકાના ભાગડાવાડા, સરદાર હાઇટસ, એમ.આઇ.જી. -૨, સાબરમતી બિલ્ડિંગનો સમાવેશ થાય છે. અત્રેના રહેવાસીઓને આવશ્યક ચીજ વસ્તુઓ જે તે નગરપાલિકા દ્વારા હોમ ડીલીવરીથી પુરી પાડવામાં આવશે. સંબંધિત વિસ્તારોના તમામ રહેવાસીઓનું સ્ક્રિનિંગ આરોગ્ય વિભાગ દ્વારા કરવામાં આવશે. આ હુકમ સરકારી ફરજ અથવા કામગીરીમાં હોય તેમજ હોમગાર્ડ કે, અન્ય સરકારી અને અર્ધ સરકારી, ખાનગી દવાખાના સ્ટાફ તથા ઇમરજન્સી સેવા સાથે સંકળાયેલા વ્યક્તિ કે, જેઓ કાયદેસરની ફરજ ઉપર હોય તથા ભારત સરકારના ગૃહ મંત્રાલયના અગાઉ ઇસ્યુ કરેલા હુકમોથી જાહેર કરવામાં આવેલ આવશ્યક સેવાઓ કે, જે માટે અધિકૃત અધિકારી દ્વારા પાસ ઇસ્યુ કરવામાં આવ્યા છે. આ હુકમનો ભંગ કરનાર વ્યક્તિ ભારતીય દંડ સંહિતા તેમજ નેશનલ ડિઝાસ્ટર મેનેજમેન્ટ એકટની જોગવાઇ મુજબ સજાને પાત્ર થશે.
