વોર્નર-ફિંચની રેકોર્ડ બ્રેક પાર્ટનરશિપ ઈનિંગ, ભારત સામે ઓસિ.નો વિજય

ત્રણ વન-ડે મેચની સીરિઝમાં કાંગારૂ ટીમે 1-0ની લીડ મેળવી

ઓસ્ટ્રેલિયાએ ભારતને ત્રણ વન-ડે મેચની સીરિઝના

પ્રથમ મેચમાં 10 વિકેટે હરાવ્યું છે. મંગળવારે મુંબઈના વાનખેડે સ્ટેડિયમમાં

રમાયેલી પ્રથમ વન-ડેમાં 256 રનના લક્ષ્યાંકનો પીછો કરવા ઉતરેલી ઓસ્ટ્રેલિયન ટીમે

37.4 ઓવરમાં જ એકપણ વિકેટ ગુમાવ્યા વગર ટાર્ગેટ પ્રાપ્ત કરી લીધો હતો. બીજી વનડે

રાજકોટ ખાતે રમાશે.

ઓસ્ટ્રેલિયન ટીમનો પ્રથમ વખત ભારત સામે 10

વિકેટે વિજય થયો છે. ડેવિડ વોર્નરે 128 રન અને કેપ્ટન એરોન ફિંચે 110 રનની અણનમ

ઈનિંગ રમીને કાંગારૂ ટીમને સીરિઝમાં 1-0થી લીડ અપાવી હતી. વોર્નર અને ફિંચે 256

રનના લક્ષ્યાંકને એકપણ વિકેટ ગુમાવ્યા વગર પાર કરી લેતા ભારત સામે સૌથી મોટી

પાર્ટનરશિપનો પણ રેકોર્ડ બનાવ્યો હતો.

વન-ડેમાં એકપણ વિકેટ ગુમાવ્યા વગર લક્ષ્યાંક

પ્રાપ્ત કરવાની બાબતે આ બીજી સૌથી મોટી ઈનિંગ છે. 2017માં દક્ષિણ આફ્રિકાના હાશિમ

અમલા અને ક્વિન્ટરન ડીકોકે બાંગ્લાદેશ સામે 279 રનનો લક્ષ્યાંક અગાઉ હાંસલ કર્યો

હતો. 2016માં ઈંગ્લેન્ડના એલેક્સ હેલ્સ અને જેસન રોયે શ્રીલંકા સામે 255 રનનો

લક્ષ્યાંક પણ મેળવ્યો હતો.

ટીમ ઈન્ડિયાની વાનખેડેમાં હાર વન-ડેમાં સળંગ

ત્રીજી હાર હતી. અગાઉ દક્ષિણ આફ્રિકા સામે 2015માં 214 રનથી ભારત હાર્યું હતુ. 2017માં

ન્યૂઝીલેન્ડે 6 વિકેટે મ્હાત આપી હતી. ભારત-ઓસ્ટ્રેલિયાની ટીમો 13 વર્ષ બાદ

આમને-સામને થઈ હતી. બન્ને વચ્ચે આ ગ્રાઉન્ડ પર ચોથી મેચ રમઆ હતી. જેમાં ભારતીય ટીમ

ફક્ત એક જ મેચ જીતી શકી હતી. ત્રણ મેચમાં ઓસ્ટ્રેલિયાનો વિજય થયો હતો. 2007માં

જ્યારે બન્ને ટીમો ટકરાઈ હતી ત્યારે ટીમ ઈન્ડિયાએ બે વિકેટે જીત મેળવી હતી.

ઓસ્ટ્રેલિયાના ઓપનર વોર્નર અને કેપ્ટન ફિંચે સદી

ફટકારી હતી. વોર્નરની 18મી વનડે સદી રહી હતી જ્યારે ફિંચની 16મી ઓડીઆઈ સદી હતી.

બન્નેએ વાનખેડેમાં રમેલી ઈનિંગ કોઈપણ ગ્રાઉન્ડપર સૌથી મોટી ભાગીદારી રહી હતી.

2017માં ન્યૂઝીલેન્ડના રોસ ટેલર અને ટોમ લાથમે ચોથા વિકેટ માટે ભારત વિરુદ્ધ 200

રનની પાર્ટનરશિપ કરી હતી. જ્યારે 2015માં ફાફ ડુપ્લેસીસ અને એબી ડિવિલિયર્સે

ત્રીજી વિકેટ માટે 2015માં અણનમ 164 રનની ઈનિંગ રમી હતી.