સુપ્રીમ કોર્ટે મહત્વપૂર્ણ ચુકાદો આપતાં જણાવ્યું છે કે ઘરેલુ ક્રૂરતા સામે કાનૂની સુરક્ષા માત્ર પરિણીત મહિલાઓ પૂરતી મર્યાદિત ન હોવી જોઈએ. જો કોઈ મહિલા લગ્ન જેવા સ્વરૂપ ધરાવતા લિવ-ઇન સંબંધમાં રહેતી હોય અને તે સંબંધમાં લગ્ન કરવાનો સ્પષ્ટ ઇરાદો દેખાતો હોય, તો તેને પણ IPCની કલમ 498A (હવે ભારતીય ન્યાય સંહિતાની કલમ 85 અને 86) હેઠળ સુરક્ષા મળવી જોઈએ.
જસ્ટિસ સંજય કરોલની અધ્યક્ષતાવાળી બેન્ચે કહ્યું કે આજના શહેરી જીવનમાં લિવ-ઇન સંબંધો એક વાસ્તવિકતા બની ગયા છે અને કાયદાએ બદલાતા સામાજિક માળખાને અનુરૂપ વિકસવું જરૂરી છે. કોર્ટે નોંધ્યું કે ક્રૂરતા એ જોઈને ઘરમાં પ્રવેશતી નથી કે મહિલા પરિણીત છે કે નહીં, તેથી આવી મહિલાઓને પણ સમાન કાનૂની રક્ષણ મળવું જોઈએ.
કોર્ટે વધુમાં જણાવ્યું કે લગ્ન જેવા સ્વરૂપ ધરાવતા અને લગ્ન કરવાનો જરૂરી ઇરાદો દર્શાવતા લિવ-ઇન સંબંધો લગ્નને સૌથી નજીક ગણાય છે, તેથી આવા સંબંધોને કલમ 498A હેઠળ રક્ષણ મળવું જોઈએ.
આ ચુકાદો એવા કેસની સુનાવણી દરમિયાન આપવામાં આવ્યો હતો,જેમાં પ્રશ્ન હતો કે લિવ-ઇન સંબંધમાં રહેલા પુરુષ સામે IPCની કલમ 498A હેઠળ કાર્યવાહી થઈ શકે કે નહીં. કોર્ટે સ્પષ્ટ કર્યું કે આજના સમયમાં મહિલાની વૈવાહિક સ્થિતિ અને ઘરેલુ ક્રૂરતા સામેના કાનૂની રક્ષણ વચ્ચે સીધો સંબંધ નથી. કાયદાનો હેતુ ઘરેલુ પરિસ્થિતિમાં થતી ક્રૂરતાથી મહિલાઓનું રક્ષણ કરવાનો છે, ભલે તેઓ પરિણીત હોય કે લગ્ન જેવા લિવ-ઇન સંબંધમાં રહેતી હોય.
