અમેરિકાએ કાબુલ બ્લાસ્ટનો લીધો બદલો; અફઘાન-પાકિસ્તાન બોર્ડર પાસે ISISના અડ્ડાઓ પર ડ્રોનથી બોમ્બમારો

અફઘાનિસ્તાનની રાજધાની કાબુલમાં બોમ્બ બ્લાસ્ટ કરનારા આતંકવાદી સંગઠન ISIS સામે અમેરિકાએ મોટી કાર્યવાહી કરી છે. અમેરિકાએ અફઘાનિસ્તાનમાં આઈએસઆઈએસના સ્થળો પર ડ્રોન હુમલા કર્યા છે. કાબુલ બ્લાસ્ટમાં અત્યાર સુધીમાં એક ડઝન અમેરિકન સૈનિકો સહિત 100થી વધુ લોકોના મોત થયા છે. આ પહેલા અમેરિકાના રાષ્ટ્રપતિ જો બિડેને કહ્યું હતું કે અમારા પર હુમલો કરનાર આતંકવાદીઓને છોડવામાં આવશે નહીં.

ઇસ્લામિક સ્ટેટ ખોરાસને કાબુલ બ્લાસ્ટની જવાબદારી લીધી હતી. અમેરિકાએ અફઘાનિસ્તાન-પાકિસ્તાન સરહદ નજીક નાંગરહાર પ્રાંતમાં આ બોમ્બ ધડાકા કર્યા છે. કહેવામાં આવી રહ્યું છે કે આ હુમલાઓમાં કાબુલ બ્લાસ્ટનો માસ્ટર માઇન્ડ માર્યો ગયો છે. કાબુલ બ્લાસ્ટ બાદ અમેરિકા ભારે દબાણમાં હેઠળ હતું. કાબુલ હુમલા બાદ અમેરિકી રાષ્ટ્રપતિ બિડેને કહ્યું હતું કે આ હુમલાઓમાં જે કોઈ સામેલ હશે, અમે તેમને છોડશું નહીં.

ઉલ્લેખનીય બાબત એ છે કે કાબુલ એરપોર્ટની બહાર થયેલા અનેક શ્રેણીબદ્ધ વિસ્ફોટોમાં 100 થી વધુ લોકોના મોત થયા છે, જેમાં 90 લોકો અફઘાન નાગરિક છે. તે જ સમયે, દોઢસોથી વધુ લોકો ઘાયલ થયા છે. અમેરિકી અધિકારીઓના જણાવ્યા અનુસાર વિસ્ફોટોમાં 13 અમેરિકી સૈનિકો પણ મૃત્યુ પામ્યા છે. વ્હાઈટ હાઉસે કહ્યું કે હુમલામાં માર્યા ગયેલા સૈનિકોના સન્માનમાં 30 ઓગસ્ટની સાંજ સુધી અમેરિકન ધ્વજ અડધો લહેરાતો રહેશે.

તાલિબાને અફઘાનિસ્તાન પર કબજો જમાવ્યો ત્યારથી હજારો અફઘાન દેશ છોડવાનો પ્રયાસ કરી રહ્યા છે અને છેલ્લા ઘણા દિવસોથી એરપોર્ટ પર ભેગા થયા છે. કાબુલ એરપોર્ટ પરથી મોટા પાયે સ્થળાંતર કામગીરી વચ્ચે પશ્ચિમી દેશોએ હુમલાની આશંકા વ્યક્ત કરી હતી. દિવસની શરૂઆતમાં, કેટલાક દેશોએ લોકોને આત્મઘાતી હુમલાની આશંકા હોવાથી એરપોર્ટથી દૂર રહેવાની અપીલ કરી હતી.