પાકિસ્તાન આર્મી ચીફની ટીકા કરતા ઈમરાન ખાનની સોશિયલ મીડિયા ટીમની ધરપકડ
પાકિસ્તાનમાં સત્તા ગુમાવ્યા બાદ ઈમરાન ખાનની પાર્ટી પાકિસ્તાન તહરીક-એ-ઈન્સાફ (પીટીઆઈ) પર વધુ એક મુશ્કેલી સર્જાઈ છે.
પાકિસ્તાનમાં સત્તા ગુમાવ્યા બાદ ઈમરાન ખાનની પાર્ટી પાકિસ્તાન તહરીક-એ-ઈન્સાફ (પીટીઆઈ) પર વધુ એક મુશ્કેલી સર્જાઈ છે. પીટીઆઈની સોશિયલ મીડિયા ટીમના આઠ સભ્યોની ધરપકડ કરવામાં આવી છે. જિયો ન્યૂઝના અહેવાલ મુજબ, પીટીઆઈની સોશિયલ મીડિયા ટીમે કથિત રીતે પાકિસ્તાનના આર્મી ચીફ જનરલ કમર જાવેદ બાજવા વિરુદ્ધ માનહાનિ અભિયાન શરૂ કર્યું હતું.
પાકિસ્તાનની ફેડરલ ઇન્વેસ્ટિગેશન એજન્સી (એફઆઇએ) એ મંગળવારે પંજાબ પ્રાંતના વિવિધ ભાગોમાં સોશિયલ મીડિયા પર આર્મી ચીફ અને સુપ્રીમ કોર્ટના ન્યાયાધીશોને નિશાન બનાવવાના મામલે ધરપકડ કરી છે. ઈમરાન ખાનને 8 એપ્રિલે વડાપ્રધાન પદેથી હટાવી દેવામાં આવ્યા હતા. ત્યારથી, તેમની પાર્ટી અને સોશિયલ મીડિયા ટીમ ટ્વિટર પર પાકિસ્તાની સેના વિરુદ્ધ સતત અભિયાન ચલાવી રહી હતી. સેના પ્રમુખ અને સુપ્રીમ કોર્ટના ન્યાયાધીશો વિરુદ્ધ સોશિયલ મીડિયા અભિયાનમાં સામેલ 50 શકમંદોની યાદી ગુપ્તચર એજન્સીઓ પાસેથી મળી છે.
જેમાંથી અત્યાર સુધીમાં 8 સભ્યોની ધરપકડ કરવામાં આવી છે. ઈમરાન ખાનના નજીકના સહયોગી અસદ ઉમરે એક ટ્વીટમાં જણાવ્યું હતું કે, "PTI સોશિયલ મીડિયા કાર્યકરોની હેરાનગતિને પડકારતી અરજીને અંતિમ સ્વરૂપ આપવામાં આવ્યું છે. તે બુધવારે હાઈકોર્ટમાં દાખલ કરવામાં આવશે." આ દરમિયાન પાકિસ્તાન આર્મીના અધિકારીઓની બેઠકમાં સોશિયલ મીડિયા પર ચાલી રહેલા અભિયાન અંગે ચર્ચા થઈ હતી. આ સાથે સંબંધિત અધિકારીઓને તેના નિરાકરણ માટે જરૂરી સૂચનાઓ આપવામાં આવી હતી.