શ્રીલંકામાં ગંભીર આર્થિક સંકટ વચ્ચે થશે નવી કેબિનેટની રચના

ગંભીર આર્થિક સંકટનો સામનો કરી રહેલા શ્રીલંકામાં લોકોના ગુસ્સાને શાંત કરવાના સરકારના પ્રયાસો વચ્ચે નવા કેબિનેટની શપથ લેવામાં આવી શકે છે. દેશના તમામ 26 મંત્રીઓએ પોતાના પદ પરથી રાજીનામું આપી દીધું હતું.

શિક્ષણ પ્રધાન અને ગૃહના નેતા દિનેશ ગુણવર્દનેએ પત્રકારોને જણાવ્યું હતું કે કેબિનેટ પ્રધાનોએ તેમના રાજીનામા વડા પ્રધાન મહિન્દા રાજપક્ષેને સુપરત કર્યા છે, જોકે તેમણે સામૂહિક રાજીનામાનું કોઈ કારણ આપ્યું નથી. રાજપક્ષે તેમના નાના ભાઈ અને રાષ્ટ્રપતિ ગોટાબાયા રાજપક્ષે સાથે મુલાકાત કરશે. શિક્ષણ મંત્રીએ કહ્યું, "અમે દેશની સ્થિતિ અંગે વિગતવાર ચર્ચા કરી. ઈંધણ અને વીજળીની કટોકટીનો ઉકેલ મળશે." દેશની આર્થિક સ્થિતિને ન સંભાળવા બદલ સરકાર સામે લોકોમાં ભારે નારાજગી છે.

વિદેશી હૂંડિયામણના ભંડારમાં ઘટાડો થવાથી સર્જાયેલી આર્થિક કટોકટી અંગે સરકારના કથિત "ખોટા વ્યવહાર" માટે મંત્રીઓ ભારે જાહેર દબાણ હેઠળ હતા. વિરોધ પ્રદર્શનને ધ્યાનમાં રાખીને દેશમાં કર્ફ્યુ લાદવામાં આવ્યો હોવા છતાં, પ્રદર્શનકારીઓ રાષ્ટ્રપતિ ગોટાબાયા રાજપક્ષેના રાજીનામાની માંગ કરી રહ્યા છે.