ભરૂચ જિલ્લાના જંબુસર તાલુકાના કહાનવા ગામ ખાતે પાર્ક કરેલી સ્કૂલ બસમાં અચાનક આગ ફાટી નીકળતા દોડધામ મચી જવા પામી હતી. જોકે, આ બસમાં બાળકો નહોતા, જેથી જાનહાનિ ટળી હતી.
ભરૂચ જિલ્લાના જંબુસર તાલુકાના કહાનવા ગામે બંગલાવગા વિસ્તારમાં સવારે સ્કૂલ બસ બાળકોને મુવાલ સ્કૂલમાં મૂકી પરત આવી રહી હતી, ત્યારે બંગલાવગા સરકારી સ્કૂલના ગેટ સામેની જગ્યામાં બસ મુકી હતી, ત્યારે અચાનક શોર્ટ સર્કિટના કારણે બસમાં આગ લાગી ગઈ હતી. જોતજોતામાં સ્કૂલ બસમાં આગની લપેટો નીકળવા લાગી હતી. થોડીવારમાં આખેઆખી બસ ભસ્મીભૂત થઈ ગઈ હતી. બનાવની જાણ થતાં જ ફાયર ફાઇટરોએ દોડી આવી આગને કાબુમાં લીધી હતી. પરંતુ ખાસ વાત તો એ કે, આ બસમાં જ્યારે બાળકો નહોતા, ત્યારે આગ લાગવાની દુર્ઘટના સર્જાય હતી, જેના કારણે મોટી જાનહાનિ ટળી હતી.
