Paytm UPI યુઝર્સ માટે સારા સમાચાર, RBI એ NPCIને Paytmની UPI સેવા જાળવવા માટે જરૂરી પગલાં લેવા જણાવ્યું

Paytm UPI યુઝર્સ માટે સારા સમાચાર આવ્યા છે. રિઝર્વ બેંકે શુક્રવારે કહ્યું કે તેણે NPCIને પેટીએમ એપની UPI કામગીરી ચાલુ રાખવા માટે તૃતીય પક્ષ એપ્લિકેશન પ્રદાતાની ઓળખ કરવાનો નિર્દેશ આપ્યો છે. કેન્દ્રીય બેંકે 15 માર્ચ, 2024 પછી પેટીએમ પેમેન્ટ બેંકને કોઈપણ પ્રકારના વ્યવહારો કરવા પર પ્રતિબંધ મૂક્યો છે.

NPCI ને એડવાઈઝરી જારી કરતી વખતે સેન્ટ્રલ બેંકે જણાવ્યું હતું કે Paytm એપ દ્વારા સેવા જાળવવા માટે NPCI એ 4-5 બેંકોના પ્રમાણપત્રની સુવિધા પૂરી પાડવી જોઈએ જે ચુકવણી સેવા પ્રદાતાઓ તરીકે ઉચ્ચ વોલ્યુમ UPI વ્યવહારો હેન્ડલ કરવાની ક્ષમતા ધરાવે છે. નોંધનીય છે કે ભારતીય રિઝર્વ બેંકના નિર્દેશો અનુસાર પેટીએમ પેમેન્ટ બેંક 15 માર્ચથી બંધ રહેશે. આવી સ્થિતિમાં Paytm ને કોઈપણ વિક્ષેપ વિના UPI વ્યવહારો ચાલુ રાખવા માટે થર્ડ પાર્ટી એપ્લિકેશન પ્રોવાઈડર (TPAP) ની જરૂર પડશે, જેની સુવિધા NPCI માન્ય બેંકો દ્વારા પ્રદાન કરવામાં આવશે.

RBIના આ આદેશથી ગ્રાહકોને UPI એકાઉન્ટ ટ્રાન્સફર કરવામાં મદદ મળશે. UPI એકાઉન્ટને એક્ટિવ રાખવા માટે તેને બેંક એકાઉન્ટ સાથે લિંક કરવું જરૂરી છે. હાલમાં એવા ઘણા ગ્રાહકો છે જેઓ Paytm પેમેન્ટ્સ બેંક દ્વારા UPI નો ઉપયોગ કરે છે. Paytm પેમેન્ટ્સ બેંક 15 માર્ચ પછી સેવાઓ પ્રદાન કરી શકશે નહીં. જો પેટીએમ પેમેન્ટ બેંકનો ગ્રાહક 15મી તારીખ પહેલા તેના UPI એકાઉન્ટને અન્ય બેંક સાથે લિંક નહીં કરે, તો તે આગળ ટ્રાન્ઝેક્શન ચાલુ રાખી શકશે નહીં.