ભારતીય શેરબજારમાં આજે મંદીનો માહોલ, સેન્સેક્સ 470 પોઈન્ટથી વધુના ઘટાડા સાથે ખુલ્યો

પશ્ચિમ એશિયામાં હમાસના હુમલા બાદ ઈઝરાયેલ અને પેલેસ્ટાઈન વચ્ચે શરૂ થયેલા યુદ્ધની અસર વ્યાપક બની રહી છે. હુમલા બાદ આજે પ્રથમવાર ઓપન માર્કેટમાં શરૂઆતમાં જ કડાકો બોલી ગયો હતો. બીએસઈ સેન્સેક્સ અને એનએસઈ નિફ્ટી બંને શરૂઆતી ટ્રેડિંગમાં મોટા ઘટાડાનો ભોગ બન્યા છે.

સેન્સેક્સ 470 પોઈન્ટથી વધુના ઘટાડા સાથે ખુલ્યો. સવારે 9:20 વાગ્યે સેન્સેક્સ 500 પોઈન્ટથી વધુ ઘટીને 65,500 પોઈન્ટની નીચે ટ્રેડ કરી રહ્યો હતો, જ્યારે નિફ્ટી લગભગ 170 પોઈન્ટ ઘટીને 19,485 પોઈન્ટની નીચે હતો.

પ્રી-ઓપન સેશનમાં માર્કેટમાં ભારે ઘટાડાનાં સંકેત દેખાઈ રહ્યાં હતાં. પ્રી-ઓપન સેશનમાં સેન્સેક્સ 600 પોઈન્ટથી વધુ તૂટ્યો હતો, જ્યારે નિફ્ટી પણ લગભગ 1 ટકાના નુકસાનમાં હતો. ગિફ્ટી સિટીમાં નિફ્ટી ફ્યુચર લગભગ 30 પોઈન્ટ ડાઉન હતા. આ તમામ સંકેતો એ વાતનો સંકેત આપી રહ્યા હતા કે બજારની શરૂઆત આજે નુકસાન સાથે થઈ શકે છે.