આજથી ધોરણ 10 અને 12 બોર્ડની પરીક્ષાનો પ્રારંભ, કુલ 16 લાખ 76 હજાર 739 વિદ્યાર્થીઓ આપશે પરીક્ષા
રાજ્યમાં 11 માર્ચથી ગુજરાત એજ્યુકેશન બોર્ડ અને હાયર સેકન્ડરી બોર્ડની ધોરણ 10 અને ધોરણ 12ની પરીક્ષાઓ શરૂ થવા જઈ રહી છે. આ પરીક્ષાઓને શાંતિપૂર્ણ રીતે અને સારા વાતાવરણમાં યોજાય તેમજ પરીક્ષા દરમિયાન કોઈપણ પ્રકારના ગેરરીતિના બનાવો ન બને તેને લઈને બોર્ડે તમામ તૈયારીઓ પૂર્ણ કરી છે.
ગુજરાતમા ધોરણ 10માં 9 લાખથી વધુ વિદ્યાર્થીઓ પરીક્ષા આપવાના છે જ્યારે ધોરણ 12માં વિજ્ઞાન પ્રવાહ અને સામાન્ય પ્રવાહની મળીને કુલ 6.21 લાખથી વધુ વિદ્યાર્થીઓ પરીક્ષા આપશે.ગુજરાત માધ્યમિક -ઉચ્ચત્તર માધ્યમિક શિક્ષણ બોર્ડ ગાંધીનગર દ્વારા આયોજિત માર્ચ 2024 ધોરણ-10 અને 12ની પરીક્ષા અંતર્ગત અમદાવાદ ગ્રામ્યના તમામ વિદ્યાર્થીઓ-વાલીઓ સરળતાથી પોતાના પરીક્ષા કેન્દ્ર સુધી પહોંચી શકે એ માટે અમદાવાદ જિલ્લા ગ્રામ્ય વિસ્તારની શિક્ષણ અધિકારી કચેરી દ્વારા કુલ 262 પરીક્ષા કેન્દ્રોના ડિજિટલ રોડ મેપની લીંક્સની એક કોમન PDF બનાવીને તમામ શાળાઓ સુધી પહોંચાડવામાં આવી છે.જિલ્લાનાં તમામ 9 તાલુકાઓના તમામ પરીક્ષા કેન્દ્રોના ગૂગલ લોકેશનની લિંક સહિત પરીક્ષા કેન્દ્ર નંબર, બિલ્ડિંગ નંબર, પરીક્ષા સ્થળનું નામ, સ્થળ સંચાલકનું નામ અને તેમના મોબાઈલ નંબર પણ આ PDF માં પરીક્ષા કેન્દ્ર અનુસાર દર્શાવવામાં આવ્યા છે. જિલ્લા શિક્ષણાધિકારી, અમદાવાદ ગ્રામ્યની કચેરી દ્વારા તમામ શાળાઓને તેમના વિદ્યાર્થીઓ અને વાલીઓ સુધી આ PDF પહોંચાડવા માટે સૂચના આપવામાં આવી છે.
