મુંબઈની કોર્ટે શ્વાનના માલિકને 4 મહિનાની જેલની સજા ફટકારી છે. શ્વાનએ લિફ્ટમાં પાડોશીને બચકું ભર્યું હતું. ત્યારબાદ પીડિતાએ પોલીસમાં ફરિયાદ નોંધાવી હતી. કોર્ટે શ્વાનના માલિક ઋષભ પટેલ પર બેદરકારીનો આરોપ લગાવ્યો હતો, અને 4 હજાર રૂપિયાનો દંડ પણ ફટકાર્યો હતો.

દેશમાં દરરોજ શ્વાન કરડવાના કિસ્સાઓ સામે આવતા રહે છે. શ્વાન ક્યારેક એટલું ખતરનાક સ્વરૂપ ધારણ કરે છે કે, તેઓ તેમના માલિકને પણ મારી નાખે છે. આવો જ એક કિસ્સો મુંબઈથી પ્રકાશમાં આવ્યો છે, જ્યાં કોર્ટે શ્વાનના માલિકને સજા ફટકારી છે. મુંબઈના વર્લીના 40 વર્ષીય વ્યક્તિને 4 મહિનાની જેલની સજા ફટકારવામાં આવી છે. કારણ કે, તેના પાલતુ શ્વાનએ એપાર્ટમેન્ટની લિફ્ટની અંદર તેના પાડોશીને કરડ્યો હતો. ઋષભ પટેલ નામના વ્યક્તિને પ્રાણી સાથે બેદરકારી બદલ દોષિત ઠેરવવામાં આવ્યો હતો. ચુકાદો સંભળાવતા જ્યુડિશિયલ મેજિસ્ટ્રેટ સુહાસ ભોસલેએ કહ્યું કે, તે આ કેસમાં 'ઉદાર' રહેશે નહીં.

સીસીટીવી ફૂટેજનો ઉલ્લેખ કરીને ન્યાયાધીશે કહ્યું કે, આરોપીએ જે રીતે પોતાના પાલતુ પ્રાણીને લિફ્ટની અંદર ખેંચ્યું તે દર્શાવે છે કે, તે તેના પાલતુ પ્રાણી પ્રત્યે સાવધ નહોતો. તેણે પીડિતાની વાતને ગંભીરતાથી લીધી ન હતી અને તેને તેના પુત્રની પરવા નહોતી. તેણે તેના પાલતુ પ્રાણીને લિફ્ટની અંદર ખેંચ્યું. વર્લીના આલ્ફા એપાર્ટમેન્ટમાં રહેતો પીડિત રમિક શાહ તેના દોઢ વર્ષના પુત્ર સાથે ચોથા માળેથી નીચે ઉતરી રહ્યો હતો, જ્યારે લિફ્ટ ત્રીજા માળે બંધ પડી, ત્યારે ઋષભ પટેલ તેના શ્વાન સાથે ઊભો હતો. રમિક શાહે કહ્યું કે, તેણે ઋષભ પટેલને રોકવા વિનંતી કરી સમજાવ્યું કે, તેનો પુત્ર સિનોફોબિક એટલે કે, શ્વાનથી ડરે છે. જોકે, ઋષભ પટેલે કથિત રીતે વિનંતીને અવગણી અને તેને બહાર નીકળવાનો સમય પણ ન આપ્યો. તેણે પોતાના શ્વાનને લિફ્ટમાં ખેંચી લીધો, જેના કારણે શ્વાન રમિક શાહની ડાબી બાજુ કરડ્યો હતો. ઘટના પછી, રમિક શાહ, તેનો પુત્ર અને સહાયક લિફ્ટ છોડી ગયા. પરંતુ ઋષભ પટેલ તેમની પાછળ ગયા અને રમિક શાહને 'તમે જે કરવા માંગો છો તે કરો'. બાદમાં તેણે તબીબી સારવારની માંગ કરી અને પોલીસ ફરિયાદ નોંધાવી. ત્યારબાદ કોર્ટમાં કેસની સુનાવણી થઈ, અને કોર્ટે શ્વાન માલિકને જેલની સજા ફટકારી રૂ. 4 હજારનો દંડ પણ ફટકાર્યો છે.