કમલ હાસન આ દિવસોમાં ઠગ લાઈફ માટે હેડલાઈન્સમાં છે. તાજેતરમાં, ફિલ્મ સંબંધિત એક કાર્યક્રમ દરમિયાન, તેમણે એવું નિવેદન આપ્યું છે, જે હવે વિવાદ સર્જતું જોવા મળી રહ્યું છે. કન્નડ સમર્થક જૂથોએ તેમની પાસેથી માફી માંગી છે, અને કર્ણાટકમાં પ્રતિબંધની ધમકી આપી છે. ચાલો જાણીએ અને સમજીએ કે શું છે સમગ્ર મામલો…
દક્ષિણ સિનેમાના દિગ્ગજ અભિનેતા કમલ હાસન ફરી એકવાર વિવાદમાં આવ્યા છે. થોડા સમય પહેલા તેમની ફિલ્મ ‘ઠગ લાઈફ‘માં ત્રિશા કૃષ્ણન સાથેના રોમેન્ટિક દ્રશ્ય માટે તેમની ટીકા થઈ હતી. પરંતુ આ વખતે તેમના એક નિવેદનથી કર્ણાટકમાં હંગામો મચી ગયો છે. કમલ હાસને ‘ઠગ લાઈફ‘ના ઓડિયો લોન્ચ ઈવેન્ટમાં આવું નિવેદન આપ્યું હતું. જેના પછી કન્નડ તરફી સંગઠનો અને નેતાઓએ તેમની સામે મોરચો ખોલ્યો છે.
ઓડિયો લોન્ચ ઈવેન્ટ દરમિયાન, કમલ હાસને તમિલમાં કહ્યું, ‘ઉયિરે ઉરવે તમિલ‘, જેનો અર્થ થાય છે ‘મારો અને મારો જીવનનો તમિલ સાથે સંબંધ છે.‘ આ દરમિયાન કન્નડ અભિનેતા શિવરાજકુમાર પણ હાજર હતા. શિવરાજકુમારનો ઉલ્લેખ કરતા કમલે કહ્યું, ‘શિવરાજકુમાર મારા પરિવારનો એક ભાગ છે, જે બીજા રાજ્યમાં રહે છે, જ્યારે મેં કહ્યું કે, મારો પરિવાર તમિલ છે, ત્યારે તેમાં તમે પણ શામેલ છો, કારણ કે, તમારી ભાષા તમિલમાંથી ઉદ્ભવી છે.‘ કમલ હાસનના આ નિવેદને કન્નડ ભાષા તમિલમાંથી ઉદ્ભવી હોવાનું કહીને વિવાદ ઉભો કર્યો છે.
