મેરી કોમે નિવૃત્તિની કરી જાહેરાત, છ વખત બની વર્લ્ડ ચેમ્પિયન

ઓલિમ્પિક મેડલ વિજેતા મેરી કોમ હવે નહીં રમે. તેણે હવે બોક્સિંગમાંથી નિવૃત્તિ લઈ લીધી છે. મેરી કોમે પોતે નિવૃત્તિની જાહેરાત કરી છે. ઉલ્લેખનીય છે કે મેરી કોમ છ વખતની વર્લ્ડ ચેમ્પિયન છે. આ સિવાય મેરી કોમ 2012ની ઓલિમ્પિક ગેમ્સમાં પણ મેડલ જીતી ચૂકી છે.

મીડિયા રિપોર્ટ્સ અનુસાર, મેરી કોમ હવે 41 વર્ષની થઈ ગઈ છે અને ઈન્ટરનેશનલ બોક્સિંગ એસોસિએશન (IBA) પુરૂષ અને મહિલા બોક્સરોને 40 વર્ષની ઉંમર સુધી જ સ્પર્ધાઓમાં ભાગ લેવાની મંજૂરી આપે છે. એક ઈવેન્ટમાં તેણે કહ્યું હતું કે મને હજુ પણ એલિટ સ્પોર્ટ્સમાં લડવાની અને જીતવાની ભૂખ છે. હું વધુ રમવા માંગુ છું. પરંતુ મારી ઉંમરને કારણે મને રમવાની પરવાનગી આપવામાં આવી રહી નથી. હું લાચાર છું. તે કમનસીબ છે. આ કારણોસર મારે નિવૃત્તિનો નિર્ણય લેવો પડ્યો છે. જોકે, સદભાગ્યે મેં મારી કારકિર્દીમાં બધું જ હાંસલ કર્યું છે.