![વિરાટ કોહલીએ રચ્યો ઇતિહાસ, T-20 ફોર્મેટમાં 12 હજાર રન પૂરા કરનાર પ્રથમ ભારતીય બેટ્સમેન બન્યો](https://img-cdn.thepublive.com/fit-in/640x430/filters:format(webp)/connect-gujarat/media/post_banners/f4116aabc693024d16a7dfab7e993b1db57b55bc05999f463dc0f25a81e3c18d.webp)
ઈન્ડિયન પ્રીમિયર લીગ એટલે કે IPLની 17મી સીઝન શરૂ થતાની સાથે જ RCBના કેપ્ટન વિરાટ કોહલીએ એક સિદ્ધિ હાંસલ કરી હતી જે દરેક માટે માઈલસ્ટોન સાબિત થશે. RCBના સ્ટાર બેટ્સમેન વિરાટ કોહલીએ T-20 ફોર્મેટમાં પોતાના બેટથી 12 હજાર રન પૂરા કરીને ઈતિહાસ રચ્યો છે.
એકંદરે તે આવું કરનાર છઠ્ઠા ક્રિકેટર છે જ્યારે તે ભારતમાંથી એકમાત્ર એવા બેટ્સમેન છે જેમને આ કમાલ કર્યો છે. કોહલીએ તેની 360મી T20 ઇનિંગમાં આ સિદ્ધિ મેળવી હતી અને આ સાથે તે અહીં સુધી પહોંચનારો બીજો સૌથી ઝડપી બેટ્સમેન બની ગયો. આ યાદીમાં માત્ર ક્રિસ ગેલ જ તેનાથી આગળ છે. ગેઈલે માત્ર 343 ઇનિંગ્સમાં આ સિદ્ધિ મેળવી હતી. કોહલી પછી ડેવિડ વોર્નર આ યાદીમાં આગળ આવે છે. તેણે 368 ઇનિંગ્સમાં 12 હજાર રન પૂરા કર્યા હતા.
કોહલીએ T20માં કુલ આઠ સદી ફટકારી છે. જેમાંથી સાત આઈપીએલમાં આવી છે. આ લીગમાં કોહલીથી વધુ કોઈએ સદી ફટકારી નથી. કોહલીએ 2007માં દિલ્હી તરફથી T20માં ડેબ્યૂ કર્યું હતું અને આ મેચમાં 35 રન બનાવ્યા હતા. T20Iમાં 4000 થી વધુ રન બનાવનાર કોહલી એકમાત્ર પુરૂષ ક્રિકેટર છે. આ ઉપરાંત, તેણે T20 વર્લ્ડ કપમાં સૌથી વધુ 1141 રન બનાવ્યા છે. કોહલીએ IPLમાં 7000થી વધુ રન બનાવ્યા છે. આવું કરનાર તે એકમાત્ર બેટ્સમેન છે.