તિરુપતિમાં ભગવાન વેંકટેશ્વર મંદિરના વૈકુંઠ દ્વાર દર્શન માટે ટોકન વિતરણ દરમિયાન નાસભાગમાં ચાર ભક્તોના મોત થયા હતા અને છ અન્ય ઘાયલ થયા હતા. અહેવાલો અનુસાર આ ઘટના તિરુપતિ વિષ્ણુ નિવાસમાં બની હતી. જ્યાં ટોકનનું વિતરણ કરવામાં આવી રહ્યું હતું. મૃતકોમાંથી એકની ઓળખ મલ્લિકા તરીકે થઈ છે, જે તમિલનાડુના સાલેમની રહેવાસી હતી.
તિરુમાલા તિરુપતિ દેવસ્થાનમ (TTD) એ 10 જાન્યુઆરીએ શુભ વૈકુંઠ એકાદશી માટે ટોકન્સનું વિતરણ કરવા માટે અલીપિરી, શ્રીનિવાસપુરમ અને અન્ય વિસ્તારોમાં નવ કેન્દ્રોમાં 94 કાઉન્ટર ખોલ્યા હતા. ઘાયલોને સારવાર માટે રુઈયા હોસ્પિટલમાં દાખલ કરવામાં આવ્યા છે.
વૈકુંઠ દ્વાર દર્શન માટે ટિકિટ આપવા માટે શ્રીનિવાસમ, વિષ્ણુ નિવાસમ, સત્યનારાયણપુરમ, તિરુપતિમાં બૈરાગીપટ્ટેડા રામાનાયડુ સ્કૂલમાં ટિકિટ કેન્દ્રો સ્થાપિત કરવામાં આવ્યા છે. જ્યારે મોટી સંખ્યામાં શ્રદ્ધાળુઓ ટિકિટ ખરીદવા આવ્યા ત્યારે નાસભાગ મચી ગઈ હતી. ટીટીડીએ જાહેરાત કરી છે કે ગુરુવારે સવારે 5 વાગ્યાથી તિરુપતિમાં નવ કેન્દ્રો પર સ્થાપિત 94 કાઉન્ટર પર વૈકુંઠ દ્વાર દર્શન ટોકન્સ જારી કરવામાં આવશે. જેના કારણે આજે સાંજથી જ ટોકન માટે ભક્તોની કતારો લાગી હતી. જ્યારે ભક્તોને કતારમાં એકસાથે પ્રવેશવાની મંજૂરી આપવામાં આવી ત્યારે નાસભાગ મચી ગઈ હતી
