CSK vs RR: રાજસ્થાને રોમાંચક મેચમાં ચેન્નાઈને 3 રનથી હરાવ્યું, ધોની અને જાડેજા મેચ પૂરી કરી નહીં શક્યા..!

રાજસ્થાન રોયલ્સે ચેન્નાઈ સુપર કિંગ્સને 3 રનથી હરાવી ટુર્નામેન્ટમાં ત્રીજી જીત નોંધાવી હતી. આ મેચમાં જીત સાથે રાજસ્થાનની ટીમ પોઈન્ટ ટેબલમાં ટોપ પર આવી ગઈ છે. પ્રથમ બેટિંગ કરતા રાજસ્થાન રોયલ્સે 8 વિકેટે 175 રન બનાવ્યા હતા. જવાબમાં ચેન્નાઈની ટીમ 6 વિકેટ ગુમાવીને 172 રન બનાવી શકી હતી અને 3 રનથી મેચ હારી ગઈ હતી. આ મેચમાં મહેન્દ્ર સિંહ ધોની અને રવિન્દ્ર જાડેજાની જોડી સંદીપ શર્મા સામે છેલ્લા 3 બોલમાં 7 રન બનાવી શકી ન હતી.

રાજસ્થાન તરફથી જોસ બટલરે 52 અને દેવદત્ત પડિકલે 38 રન બનાવ્યા હતા. અશ્વિન અને હેટમાયરે 30-30 રન બનાવ્યા હતા. ચેન્નાઈ તરફથી રવિન્દ્ર જાડેજા, આકાશ સિંહ અને તુષાર દેશપાંડેએ 2-2 વિકેટ લીધી હતી. મોઈન અલીને 1 વિકેટ મળી હતી. તે જ સમયે ચેન્નાઈ તરફથી ડેવોન કોનવેએ 50, મહેન્દ્ર સિંહ ધોનીએ 32 અને અજિંક્ય રહાણેએ 31 રન બનાવ્યા હતા. જાડેજા 25 રન બનાવીને અણનમ રહ્યો હતો. રાજસ્થાન તરફથી અશ્વિન અને ચહલે 2-2 વિકેટ લીધી હતી. ઝમ્પા અને સંદીપ શર્માને 1-1 વિકેટ મળી હતી.