IPL 2023 : મુંબઈ ઈન્ડિયન્સે લગાવી જીતની હેટ્રિક, સનરાઈઝર્સ હૈદરાબાદને 14 રનથી હરાવ્યું
IPL 2023 ની 25મી મેચમાં મુંબઈ ઈન્ડિયન્સ (MI) એ સનરાઈઝર્સ હૈદરાબાદ (SRH) ને 14 રનથી હરાવ્યું. આ સાથે મુંબઈ ઈન્ડિયન્સે પણ જીતની હેટ્રિક લગાવી હતી. આ મેચમાં 193 રનના ટાર્ગેટનો પીછો કરવા ઉતરેલી હૈદરાબાદની ટીમ 19.5 ઓવરમાં 178ના સ્કોર પર સમેટાઈ ગઈ હતી. મુંબઈ માટે કેમેરોન ગ્રીનનું ઓલરાઉન્ડ પ્રદર્શન જોવા મળ્યું, જેણે બેટ વડે 64 રન બનાવ્યા અને મેચમાં 1 વિકેટ પણ લીધી. હૈદરાબાદને છેલ્લા 12 બોલમાં 24 રન બનાવવાના હતા ત્યારે ગ્રીને ચાર રનની ઓવર નાખીને પોતાની ટીમને મજબૂત સ્થિતિમાં પહોંચાડી દીધી હતી.
193 રનના સ્કોરનો પીછો કરવા ઉતરેલી સનરાઇઝર્સ હૈદરાબાદની ટીમને પોતાની ઓપનિંગ જોડી પાસેથી સારી શરૂઆતની અપેક્ષા હતી. ટીમને 11ના સ્કોર પર પહેલો ફટકો ગત મેચના સદીના ખેલાડી હેરી બ્રુકના રૂપમાં લાગ્યો હતો જે 9 રન બનાવીને પેવેલિયન પરત ફર્યો હતો. આ પછી હૈદરાબાદને બીજો ફટકો 25 રનના સ્કોર પર રાહુલ ત્રિપાઠીના રૂપમાં લાગ્યો હતો, જે 7 રનની ઇનિંગ રમીને પેવેલિયન પરત ફર્યો હતો. અહીંથી મયંક અગ્રવાલે કેપ્ટન એડન માર્કરામ સાથે મળીને ઈનિંગને સંભાળી અને ટીમને પ્રથમ 6 ઓવરમાં 42 રન સુધી પહોંચાડી દીધી.
