PBKS vs MI: મુંબઈએ પંજાબને 6 વિકેટે હરાવ્યું, ઈશાન કિશન અને સૂર્યકુમારે અડધી સદી ફટકારી

મુંબઈ ઈન્ડિયન્સે પંજાબ કિંગ્સને તેમના હોમ ગ્રાઉન્ડ પર હરાવી ટુર્નામેન્ટમાં પાંચમી જીત મેળવી છે. મોહાલીના પંજાબ ક્રિકેટ એસોસિએશન સ્ટેડિયમમાં ઈશાન કિશન અને સૂર્યકુમાર યાદવે ધમાકેદાર ઇનિંગ્સ રમ્યા બાદ તિલક વર્મા અને ટિમ ડેવિડે મેચને શૈલીમાં પૂરી કરી. મુંબઈના કેપ્ટન રોહિત શર્માએ ટોસ જીતીને પ્રથમ બોલિંગ કરવાનો નિર્ણય કર્યો હતો. પંજાબે 20 ઓવરમાં 3 વિકેટે 214 રન બનાવ્યા હતા. મુંબઈએ 18.5 ઓવરમાં ચાર વિકેટે 216 રન બનાવીને મેચ જીતી લીધી હતી.

મુંબઈ માટે ઈશાન કિશન અને સૂર્યકુમાર યાદવે ત્રીજી વિકેટ માટે 116 રનની ભાગીદારી નોંધાવી હતી. ઈશાને 41 બોલમાં 75 રન બનાવ્યા હતા. તેણે સાત ચોગ્ગા અને ચાર છગ્ગા ફટકાર્યા હતા. તેમજ સૂર્યકુમાર યાદવે 31 બોલમાં 66 રનની ઇનિંગ રમી હતી. તેણે આઠ ચોગ્ગા અને બે છગ્ગા ફટકાર્યા હતા. આ બે સિવાય તિલક વર્માએ અંતે ઝડપી રન બનાવ્યા અને મેચ પૂરી કરી. તિલકે 10 બોલમાં અણનમ 26 રન બનાવ્યા હતા. તેણે એક ફોર અને ત્રણ સિક્સર ફટકારી હતી. ટિમ ડેવિડે 10 બોલમાં ત્રણ ચોગ્ગાની મદદથી 19 રન બનાવ્યા હતા. તિલકે 19મી ઓવરના પાંચમા બોલ પર સિક્સ ફટકારીને મેચનો અંત આણ્યો હતો.