RCB vs GT : ગુજરાત ટાઇટન્સે RCBને IPLમાંથી બહાર ફેંકી દીધું, કોહલીની સદી પર શુભમન ગીલની સદી ભારે પડી.!

ગુજરાત ટાઇટન્સે RCBનું સપનું તોડ્યું હતું. ફાફ ડુપ્લેસીસની કેપ્ટનશીપવાળી ટીમ ફરી એકવાર ખિતાબથી ઘણી દૂર રહી. ગત વખતે પ્લેઓફમાં પહોંચેલી આરસીબી આ વખતે પાંચમા સ્થાને રહી હતી. ગુજરાતની જીતનો ફાયદો મુંબઈ ઈન્ડિયન્સને મળ્યો. તે 16 પોઈન્ટ સાથે ચોથા સ્થાને છે. તે સમયે RCBને 14 પોઈન્ટથી સંતોષ માનવો પડ્યો હતો. તેનો નેટ રનરેટ મુંબઈ કરતા ઘણો સારો હતો. આવી સ્થિતિમાં ટીમને પ્લેઓફમાં પહોંચવા માટે જીતની જરૂર હતી, પરંતુ એવું થયું નહીં.

ગુજરાતના કેપ્ટન હાર્દિક પંડ્યાએ ટોસ જીતીને પ્રથમ બોલિંગ કરવાનો નિર્ણય કર્યો હતો. આરસીબીએ 20 ઓવરમાં 5 વિકેટે 197 રન બનાવ્યા હતા. જવાબમાં ગુજરાતે 19.1 ઓવરમાં 4 વિકેટે 198 રન બનાવ્યા હતા. આ મેચમાં બે સદી ફટકારવામાં આવી હતી. અનુભવી વિરાટ કોહલીએ RCB માટે અણનમ 101 રન બનાવ્યા હતા. આ સાથે જ યુવા સ્ટાર શુભમન ગિલે અણનમ 104 રન બનાવ્યા હતા. આ વખતે યુવા ગિલની સદીએ અનુભવી કોહલીની સદી પર ભારે પડી હતી.

ગુજરાત તરફથી શુભમન ગિલે અણનમ 104 રન બનાવ્યા હતા. તેણે 52 બોલની ઈનિંગમાં પાંચ ચોગ્ગા અને આઠ છગ્ગા ફટકાર્યા હતા. વિજય શંકરે 35 બોલમાં 53 રનની ઇનિંગ રમી હતી. રિદ્ધિમાન સાહા 12 અને ડેવિડ મિલર 6 રન બનાવીને આઉટ થયા હતા. દાસુન શનાકા ખાતું ખોલાવી શક્યો ન હતો. રાહુલ તેવટિયાએ અણનમ ચાર રન બનાવ્યા હતા. આરસીબી તરફથી મોહમ્મદ સિરાજે બે વિકેટ ઝડપી હતી. વિજયકુમાર અને હર્ષલ પટેલે એક-એક વિકેટ લીધી હતી.

આ પહેલા RCB તરફથી વિરાટ કોહલીએ 61 બોલમાં અણનમ 101 રન બનાવ્યા હતા. તેણે પોતાની ઇનિંગમાં 13 ફોર અને 1 સિક્સર ફટકારી હતી. કેપ્ટન ફાફ ડુપ્લેસિસે 28, માઈકલ બ્રેસવેલે 26 અને અનુજ રાવતે 15 બોલમાં અણનમ 23 રન બનાવ્યા હતા. ગ્લેન મેક્સવેલ 11 અને મહિપાલ લોમરોર એક રન બનાવીને આઉટ થયા હતા. દિનેશ કાર્તિક ખાતું ખોલાવી શક્યો નહોતો. ગુજરાત તરફથી નૂર અહેમદે સૌથી વધુ બે વિકેટ ઝડપી હતી. મોહમ્મદ શમી, રાશિદ ખાન અને યશ દયાલને એક-એક સફળતા મળી.