અમરેલી જિલ્લાના સુરાગપૂર ગામમાં દોઢ વર્ષીય બાળકી અચાનક બોરવેલમાં પડી જતાં તંત્રમાં દોડધામ મચી હતી.
મળતી માહિતી અનુસાર, અમરેલી જિલ્લાના સુરાગપૂર ગામના વાડી વિસ્તારમાં ખેત મજૂરની દોઢ વર્ષની આરોહી નામની બાળકી રમતા રમતા બોરવેલમાં પડી ગઈ હતી. બાળકી બોરવેલમાં ખાબકતા માતા-પિતા સહિતનો પરિવાર હતપ્રભ થઈ ઉઠ્યો હતો. બનાવની જાણ થતાં જ 108 ઈમરજન્સી, ફાયર વિભાગની ટીમ સહિત પોલીસ કાફલો તાત્કાલિક ઘટનાસ્થળે દોડી આવ્યો હતો.
108 ઈમરજન્સી દ્વારા બાળકીને બોરવેલમાં ઑક્સિજન આપવાની કામગીરી કરવામાં આવી હતી. દોઢ વર્ષની બાળકી બોરવેલમાં 45થી 50 ફૂટના અંતરે હોવાનું પ્રાથમિક અનુમાન લગાડવામાં આવ્યું હતું. તો બીજી તરફ, સાંસદ ભરત સુતરીયા અને ઘારાસભ્ય જનક તળાવિયા, લાઠી પ્રાંત અધિકારી સહિત મામલતદાર પણ ઘટનાસ્થળે પહોંચ્યા હતા. પ્રશાસન દ્વારા બાળકીને બહાર કાઢવા માટે રાજુલાથી યંત્ર રોબોટની ટીમ પણ બોલાવવામાં આવી છે, ત્યારે હાલ તો બાળકી આરોહી માટે પ્રાર્થનાનો દોર શરૂ થયો છે.