અરવલ્લી: ગાજણ ગામના લોકો રસ્તાની સમસ્યાથી ત્રાહિમામ, પાકા રસ્તાની કરી માંગ

અરવલ્લી જિલ્લાના માલપુર તાલુકાના ગાજણ ગામના લોકો રસ્તાની સમસ્યાથી ત્રાહિમામ પોકારી ઉઠ્યા છે અને પાકા રસ્તાની માંગ કરી રહ્યા છે

અરવલ્લી જિલ્લાના માલપુર તાલુકાના ગાજણ ગામથી તાલુકા મથક જવા માટે આ ગામના લોકોને 16 કિલોમીટરનું અંતર કાપીને જવું પડે છે.પરંતુ ગાજણથી કાસવાડા પહોંચતાં સુધીમાં તો મુસાફરો અને વાહનચાલકો તોબા પોકારી જાય છે.જેથી આ વિસ્તારની જનતાની એક જ માંગ છે કે આ માર્ગ ડામર રોડ બનાવી આપો.હાલ ચોમાસાની ઋતુમાં આ કાચા માર્ગ પર એટલો બધો કાદવ કીચડ થાય છે કે અહીંથી વાહન લઈને પસાર થવું મુશ્કેલ બની ગયું છે.વારંવાર તાલુકા કક્ષાએ આ માર્ગ પાકો બનાવવા માટે રજુઆતો કરવામાં આવી છે પરંતુ તંત્રના બહેરા કાને આ વિસ્તારના લોકોની સમસ્યા પહોંચતી નથી.જો હાલ પુરતું ચોમાસામાં આ માર્ગ પર કાચું મટીરીયલ પાથરીને અવરજવર યોગ્ય કરી આપવામાં આવે તો આ વિસ્તારના લોકોને તાલુકા મથકે તેમના રોજીંદા કામ અર્થે જવામાં સરળતા રહે. આ માર્ગ ડામર રોડ બનાવી આપવા જનતાની માંગ છે.