ભરૂચ: તમામ 9 તાલુકામાં સાર્વત્રિક વરસાદ, હાંસોટ-વાલિયામાં સરેરાશ 3.5 ઇંચ વરસાદ નોંધાયો

ભરૂચ અને જિલ્લામાં છેલ્લા 4 દિવસથી વરસાદી માહોલ જોવા મળી રહ્યો છે. જિલ્લામાં સાર્વત્રિક વરસાદ વરસતા વાતાવરણમાં ઠંડક પ્રસરી છે.

બીજી તરફ ખેતીલાયક વરસાદ વરસતા ખેડૂતોમાં ખુશીનો માહોલ જોવા મળી રહ્યો છે ત્યારે વિતેલા 24 કલાકમાં પણ જિલ્લાના તમામ 9 તાલુકામાં વરસાદ નોંધાયો હતો.

સવારથી સમગ્ર દિવસ દરમિયાન છૂટાછવાયા વરસાદી ઝાપટા પડ્યા હતા. સૌથી વધુ હાંસોટ તાલુકામાં 4 ઇંચ જેટલો વરસાદ નોંધાયો છે તો બીજી તરફ વાલીયા તાલુકામાં 3.5 ઇંચ વરસાદ નોંધાયો હતો. ભરૂચ જિલ્લામાં વરસેલ વરસાદના તાલુકાવાર આંકડા પર નજર કરીએ તો જંબુસર 18 મી.મી.,આમોદ 6 મી.મી.,વાગરા 4 મી.મી.ભરૂચ 17 મી.મી.,ઝઘડિયા 11 મી.મી.,અંકલેશ્વર 2 ઇંચ,હાંસોટ 4 ઇંચ,વાલિયા 3.5 ઇંચ,નેત્રંગમાં 1 ઇંચ વરસાદ નોંધાયો હતો.