• ઓટો પાર્ટ્સના વ્યવસાય સાથે સાથે યુવકને અનોખો શોખ

• પાર્ટ ટાઈમ પેઇન્ટિંગનો શોખ ધરાવતો ભડકોદ્રાનો યુવાન

• યુવકે વડોદરાની MSUમાંથી કર્યો છે ફાઇન આર્ટ્સનો કોર્સ

• વિવિધ ચિત્રો બનાવી લોકો સમક્ષ રજૂ કરી પોતાની પ્રતિભા

• અનેક નેતાઓના સ્કેચ તૈયાર કરી ભેટ સ્વરૂપે અર્પણ કર્યા 

કહેવત છે કે, મન હોય તો માળવે જવાય... આ કહેવતને સાર્થક કરી બતાવી છે ભરૂચ જિલ્લાના અંકલેશ્વરના એક યુવકે… ઓટો પાર્ટસની દુકાન ધરાવતા રજનિ પ્રજાપતિને વ્યવસાયની સાથે સાથે પાર્ટ ટાઈમ પેઇન્ટિંગ કરવાનો પણ અનોખો શોખ છે. જુઓ કનેક્ટ ગુજરાતનો વિશેષ અહેવાલ...

ભરૂચ જિલ્લાના અંકલેશ્વર તાલુકાના ભડકોદ્રા ગામમાં રહેતા રજની પ્રજાપતિ વ્યવસાયની સાથે સાથે પાર્ટ ટાઈમ પેઇન્ટિંગ કરવાનો પણ અનોખો શોખ ધરાવે છે. રજનિ પ્રજાપતિએ વડોદરાની એમ.એસ. યુનિવર્સિટીમાંથી બેચલર ઓફ ફાઇન આર્ટ્સનો કોર્સ કર્યો છે. જોકે, પરિવારને આર્થિક મદદ મળી રહે તે માટે આ યુવકે GIDC વિસ્તારની પ્રતિન ચોકડી નજીક છેલ્લા 10 વર્ષથી ઓટો પાર્ટસની દુકાન શરૂ કરી છે. અમુક પરિસ્થિતિને લઈને રજનિ પ્રજાપતિએ વ્યવસાયની સાથે સાથે પેઇન્ટિંગ બનાવવાનું પણ યથાવત રાખ્યું છે.

આ યુવકે અલગ અલગ ચિત્રો બનાવી પોતાની કળા અને પ્રતિભાને પેઇન્ટિંગ દ્વારા રજૂ કર્યા છે. જેમાં તેઓએ સ્લેપ્સ સ્કેચ પેઇન્ટિંગ, વોટર કલર પેઇન્ટિંગ, ઓઇલ પેઇન્ટિંગ, કેનવાસ પેઇન્ટિંગ, પોટ્રેઇટ પેઇન્ટિંગ જેવા ઘણા બધા સ્કેચ તૈયાર કર્યા છે. અત્યાર સુધીમાં રજનિ પ્રજાપતિએ અંકલેશ્વરના ધારાસભ્ય ઈશ્વર પટેલ, મર્હૂમ સાંસદ અહેમદ પટેલ, કોંગ્રેસ નેતા મુમતાઝ પટેલ સહિત અનેક નેતાઓના સ્કેચ તૈયાર કરી તેઓને ભેટ સ્વરૂપે અર્પણ પણ કર્યા છે.

અત્રે ઉલ્લેખનીય છે કે, આ યુવક દ્વારા અનેક ચિત્રો તૈયાર કરી લોકોને વેંચવામાં નથી આવતા, પરંતુ યુવક આ ચિત્રોને ભેટમાં આપે છે, ત્યારે વ્યવસાયની સાથે જ પાર્ટટાઇમ પેઇન્ટિંગ વર્ક કરી પોતાની કળાને લોકો સમક્ષ રજૂ કરી છે. કહેવાય છે કે, પરિશ્રમનો કોઈ ખાસ મંત્ર નથી હોતો. એતો અથાગ મહેનત, દ્રઢ મનોબળ અને આત્મવિશ્વાસનું પરિણામ છે, તે અંકલેશ્વરના ભડકોદ્રા ગામના યુવક રજનિ પ્રજાપતિએ સાબિત કરી બતાવ્યુ છે.