ભરૂચ : શહેર અને જિલ્લામાં ઉમંગ અને આસ્થાભેર હોલિકા દહન, ભક્તિભાવ પૂર્વક કરાય ઉજવણી

ભરૂચ, અંકલેશ્વર શહેર સહિત જિલ્લામાં હોળી પર્વની પરંપરાગત ઉજવણી કર્યા બાદ બુધવારે રંગોના પર્વ ધુળેટીને ઉજવવા લોકો સજ્જ બન્યા છે.

આસ્થાના પર્વ હોળીની ભરૂચ જિલ્લામાં ઠેર ઠેર ઉત્સાહ સાથે પરંપરાગત ઉજવણી કરવામાં આવી હતી. સંધ્યાકાળે શુભ મુહૂર્તમાં ઠેર ઠેર હોલિકા દહન કરાયું હતું જે નિર્વિઘ્ને પાર પડ્યું હતું. શ્રદ્ધાળુઓએ હુતાશણીમાં નારિયેળ, ધાણી, ચણા, ખજૂર, હોમીને બાળકો અને પરિવારના સ્વાસ્થ્ય તેમજ સમૃદ્ધિ માટે પ્રાર્થના કરી હતી. મહિલાઓએ હોળી માતાની પૂજા કરી પરિવારના સુખ, સમૃદ્ધિ અને આરોગ્ય માટેની મંગલકામનાઓ કરી હતી.પૌરાણિક કથાઓ મુજબ ભક્ત પ્રહલાદની અખંડ ભક્તિ અને હોલિકાના દહન દ્વારા સત્યના વિજયનું પ્રતિક મનાય છે. આ પ્રસંગે લોકો અગ્નિની પરિક્રમા કરીને સુખ-શાંતિ માટે પ્રાર્થના કરે છે.

આવતીકાલે ચંદ્રગ્રહણના પગલે રંગોના પર્વ ધુળેટીની બુધવારના રોજ ઉજવણી કરવામાં આવશે.રંગોના પર્વ ધુળેટીની એકમેકને રંગ લગાવી  ઉજવણી કરવા ભરૂચના રંગ રસિયાઓ સજ્જ બન્યાં છે.