ભાવનગર શહેરમાં પોલીસ પેટ્રોલીંગ દરમ્યાન જાહેર રોડ ઉપર બુટલેગરના જન્મદિવસની ઉજવણીનો વિડિયો વાયરલ થતાં જિલ્લા પોલીસ વડા ડો. હર્ષદ પટેલ દ્વારા તપાસના આદેશ આપવામાં આવ્યા છે.
ભાવનગર શહેર તથા જિલ્લામાં ગુનાનો ક્રાઈમ રેટ ખૂબ વધી રહ્યો છે, ત્યારે ભાવનગર શહેરની ચિત્રા મીલેટરી સોસાયટીમાં રાત્રિના સમયે જાહેર રોડ પર પોલીસ પેટ્રોલીંગ દરમ્યાન બુટલેગરે મિત્રો સાથે યોજેલી બર્થ-ડે પાર્ટીનો વિડીયો સોશિયલ મીડિયામાં ખૂબ વાયરલ થઈ રહ્યો છે. મળતી માહિતી અનુસાર, શહેરના બોરતળાવ ડી’ ડિવિઝન પોલીસ મથકના હદમાં ચિત્રા જીઆઇડીસી વિસ્તાર આવેલો છે, જ્યાં કુખ્યાત બુટલેગર વિજય ઉર્ફે ભાણું નામનો શખ્સ ઘણા વર્ષોથી વિદેશી દારૂનું સ્ટેન્ડ ચલાવી રહ્યો છે.
ત્યારે હાલ તો પોલીસ પેટ્રોલીંગ દરમ્યાન જાહેર રોડ પર બુટલેગરના જન્મદિવસની ઉજવણીનો વિડિયો વાયરલ થતાં જિલ્લા પોલીસ વડા ડો. હર્ષદ પટેલ દ્વારા તપાસના આદેશ આપવામાં આવ્યા છે. અત્રે ઉલ્લેખનીય છે કે, ભાવનગરની LCB અને SOG પોલીસને પણ ગાલ પર તમાચા સમાન બુટલેગરના જન્મદિવસની જાહેર પાર્ટીનો વિડિયો વાયરલ થતાં પોલીસની કામગીરી સામે પણ સવાલો ઊભા થયા છે. જોકે, વાયરલ વિડિયો અત્યારના સમયનો છે કે, અગાઉના સમયનો જૂનો વિડિયો છે તે અંગે પણ પોલીસ દ્વારા તપાસ હાથ ધરવામાં આવી છે.