જુનાગઢ:વંથલીમાં ટ્રેકટર પલટી મારી જતાં ગટરમાં ખાબક્યું, 2 શ્રમિકના મોત

જુનાગઢ જિલ્લાના વંથલી શહેર નજીક વાલીયા સીમ વિસ્તારમાં ટ્રેક્ટર પલટી મારી જતાં 2 શ્રમિકના મોત થયાની ઘટનાથી ચકચાર મચી જવા પામી છે.

મળતી માહિતી અનુસાર, જુનાગઢના વંથલી-વાલીયા સીમ વિસ્તારમાં ટ્રેક્ટરમાં 2 શ્રમિક સવાર હતા, ત્યારે ટ્રેક્ટર લાકડા ભરવા જતું હતું, તે સમયે વાલીયા સીમ વિસ્તાર નજીક ચાલકનો સ્ટિયરિંગ પર કાબુ ન રહેતા ટ્રેક્ટર પલટી મારી જઈ ગટરમાં ખાબક્યું હતું. બનાવની જાણ થતા સીમ વિસ્તારની આસપાસના ખેડૂતો ભેગા થયા હતા, ત્યારે ટ્રેક્ટરમાં સવાર બન્ને શ્રમિકોના ઘટના સ્થળે જ મોત થયા હોવાનું સામે આવ્યું હતું.

બનાવની જાણ થતાં જ પોલીસ કાફલો તાત્કાલિક ઘટનાસ્થળે દોડી આવ્યો હતો, જ્યાં તપાસ કરતાં ટ્રેક્ટરમાં સવાર મૃતક 25 વર્ષીય રફીક મીર અને 15 વર્ષીય સગીર તોફિક મિર હોવાનું જાણવા મળ્યું હતું. બન્ને શ્રમિકોના આકસ્મિક મોતથી પરિવારમાં શોકનું મોજુ ફરી વળ્યું છે, ત્યારે હાલ તો પોલીસે અકસ્માતે 2 લોકોના મોતનો ગુન્હો નોંધી આગળની કાર્યવાહી હાથ ધરી છે.