પંચમહાલ : દલવાડા ગામે લીલા ગાંજાના જથ્થા સાથે પોલીસે કરી એક ઈસમની અટકાયત...

પંચમહાલ જીલ્લાના શહેરા તાલુકાના દલવાડા ગામે ખેતરમાં લીલા ગાંજાના છોડની ખેતી એસઓજી પોલીસે ઝડપી પાડી હતી. પોલીસે ચોક્કસ બાતમીના આધારે રેડ પાડી હતી. પોલીસે 31.830 કિલો ગાંજાના છોડ ઝડપી પાડી કાયદેસરની કાર્યવાહી હાથ ધરી હતી.

રાજ્યમા નશાકારક પદાર્થો પર પ્રતિબંધ છે. અવારનવાર રાજ્યમાં નશાકારક પદાર્થ ઝડપાતા રહે છે. પંચમહાલના શહેરા તાલુકાના દલવાડા ગામમાં નશાના કારોબારનો પર્દાફાશ થયો છે. વિક્રમસિંહ પગી નામના વ્યક્તિના ખેતરમાંથી 31.830 કિ.ગ્રાના લીલા ગાંજાના છોડ ઝડપાયા છે.

ગોધરા SOGએ બાતમીના આધારે ખેતરમાં રેડ કરતા પ્રતિબંધિત ગાંજાના છોડ ઝડપી પાડયા હતા. રૂપિયા 3,18,300 કિંમતના લીલા ગાંજાના છોડ સાથે ખેતર માલિકની ગોધરા SOGએ ધરપકડ કરી હતી. આ બનાવની પ્રાપ્ત માહિતી અનુસાર એસઓજી શાખાના પોલીસ સબ ઇન્સ્પેક્ટર આર.એન.પટેલએ જણાવ્યું હતું કે, શહેરા તાલુકાના દલવાડા ગામે પગી ફળિયામાં રહેતા વિક્રમસિંહ પ્રતાપસિંહ પગી પોતાના ખેતરમાં ગાજાનું વાવેતર કરી રહ્યો છે. તેવી બાતમી મળી હતી, જે બાતમીના આધારે બાતમી વાળી જગ્યાએ રેડ કરતા 15 નંગ ગાજાના છોડ જેનું વજન 31.830 કિલોગ્રામ જેની કિંમત 3,18,300નો મુદ્દામાલ સાથે વિક્રમસિંહ પગીની અટકાયત કરી વધુ તપાસ હાથ ધરી હતી.