આજથી ગુજરાતમાં વરસાદનું જોર વધશે, રાજ્યમાં  એક સાથે ચાર વરસાદી સિસ્ટમ સક્રિય થતાં ભારે વરસાદ વરસવાની સંભાવના

આજથી ગુજરાતમાં વરસાદનું જોર વધશે.  હવામાન વિભાગે ગુજરાતમાં ભારે વરસાદની આગાહી કરી હતી. હવામાન વિભાગના અનુસાર, રાજ્યમાં  એક સાથે ચાર વરસાદી સિસ્ટમ સક્રિય થતાં ભારે વરસાદ વરસવાની સંભાવના છે.

આજે રાજ્યના 13 જિલ્લામાં વરસાદનું યલો એલર્ટ જાહેર કરાયું છે. દક્ષિણ ગુજરાત અને મધ્ય ગુજરાતમાં આજે ભારે વરસાદ ખાબકી શકે છે. અરવલ્લી, મહીસાગર, પંચમહાલ, દાહોદ, વડોદરા, છોટા ઉદેપુર, નર્મદા, ભરૂચ, સુરત, ડાંગ, તાપી, નવસારી, વલસાડ જિલ્લામાં છૂટાછવાયા સ્થળો પર ભારે વરસાદની આગાહી આપવામાં આવી છે. ગુજરાતમાં અત્યાર સુધી સીઝનનો 65 ટકા વરસાદ વરસી ચૂક્યો છે.

દિલ્હી-NCRમાં થોડા દિવસના વિરામ બાદ મેઘરાજાનું ધમાકેદાર આગમન થયું છે. દિલ્લી-NCR સહિત આસપાસના વિસ્તારમાં ગઈકાલથી વરસાદ વરસી રહ્યો છે. સવારે કેટલાક વિસ્તારમાં ધોધમાર તો કેટલાક વિસ્તારમાં ધીમીધારે વરસાદ ખાબક્યો હતો. વરસાદને લઈને દિલ્લીના કેટલાક વિસ્તારમાં પાણી ભરાઈ ગયા, જેને લઈને નોકરી-ધંધે જતા લોકોને હાલાકીનો સામનો કરવો પડયો. બીજી તરફ દેશની આર્થિક રાજધાની મુંબઈમાં પણ મેઘરાજાએ મહેર કરી હતી. સવારથી મુંબઈના અલગ અલગ વિસ્તારમાં વરસાદ વરસી રહ્યો છે.