સાબરકાંઠા: રંગ બદલતો દુર્લભ પ્રજાતિનો કાચિંડો નજરે પડતા કુતુહલ,જુઓ શું છે વિશેષતા

સાબરકાંઠાના જિલ્લામાં ગાંભોઈ પંથકમાં શરીરનો રંગ બદલતો 'જેક્શન કેમેલિયન' જાતિનો જંગલી કાચિંડો દેખાયો શરીરના આવરણને ભૂરા, લાલ, પોપટી અને પીળા રંગમાં બદલી શકે છે.

કાચીડાંની જેમ રંગ બદલતા રાજકારણ અને માનવીય સ્વભાવ પર કાચીંડાની કહેવતો અવારનવાર પ્રજાના મુખે સાંભળવા મળી છે પરંતુ આ કહેવતને સાર્થક કરતો અને ભાગ્યે જ દેખા દેતો જેને આપણે અંગ્રેજીમાં જેક્શન કેમેલિયન, હિન્દીમાં ગીરગીટ અને ગુજરાતીમાં રંગ બદલતો કાચીંડો કહીએ છીએ. જે કચ્છના ચિકારા અભયારણ્યમાં ખાસ જોવા મળે છે. જે નષ્ટ પ્રાયઃ જાતિએામાં સમાવિષ્ટ છે. આ 'જેક્શન કેમેલિયન' પ્રજાતિનો રંગ બદલતો કાચીંડો હિંમતનગર તાલુકાના ગાંભોઈ પંથકના ગ્રામ્ય જંગલ સીમાડામાં દેખાતાં ગ્રામ્ય પ્રજામાં ભારે કુતૂહલ ફેલાયું હતું. ગાંધીપુરાકંપા ગામના ખેડૂત ભરતભાઈ પટેલ પોતાના ખેતર પાસેના જંગલ વિસ્તારમાં પસાર થઈ રહ્યા હતા ત્યારે જવલ્લે જોવા મળતો લીલા રંગનો જંગલી કાચીંડો નજરે પડ્યો હતો. આ અંગે જીવદયા પ્રેમી ભરત પટેલે વધુ માહિતી આપતા જણાવ્યુ હતું કે ગ્રામ્ય અને શહેરી વિસ્તારોમાં દેખાતા સામાન્ય કાચીંડાંથી અલગ વિશિષ્ટતા ધરાવતો આ જંગલી કાચિંડો જેકસન કેમેલિયન તરીકે ઓળખાય છે. જે શરીર આવરણના રંગ બદલવાની સાથે માથા પર ત્રણ નાના શીંગડા જોવા મળે છે. ખાસ કરીને ડુંગરોના ગાઢ જંગલોમાં ઝાડની ટોચની ડાળી પર પૂંછડી લપેટીને ઉંધા માથે લટકતો જોવા મળે છે.