અમેરિકાએ ઈરાની યુદ્ધ જહાજ પર કર્યો હુમલો , 87 ખલાસીઓના મોત, 180 લોકો હતા સવાર

હિંદ મહાસાગરમાં શ્રીલંકાના દક્ષિણ તટ નજીક એક ભારે સૈન્ય ઘટના સામે આવી છે જ્યાં અમેરિકન પનડૂબીએ ઇરાનના યુદ્ધપોત IRIS Dena પર ટોર્પીડો હુમલો કરીને તેને સમુદ્રમાં ડૂબાડી દીધો હોવાનો દાવો કરવામાં આવ્યો છે. આ ઘટનામાં ઓછામાં ઓછા 87 નૌસૈનિકોના મોત થયા હોવાનું શ્રીલંકા નૌસેનાએ જણાવ્યું છે, જ્યારે 32 લોકોને જીવતા બહાર કાઢવામાં આવ્યા છે.

અમેરિકાના રક્ષા સચિવ Pete Hegseth એ સત્તાવાર રીતે પુષ્ટિ કરી કે શ્રીલંકાના દક્ષિણ તટ નજીક એક અમેરિકન પનડૂબીએ ઇરાની યુદ્ધપોત પર હુમલો કર્યો હતો. તેમણે જણાવ્યું કે આ જહાજ આંતરરાષ્ટ્રીય જળક્ષેત્રમાં પોતાને સુરક્ષિત માની રહ્યું હતું. હેગસેથે દાવો કર્યો કે દ્વિતીય વિશ્વયુદ્ધ બાદ પહેલીવાર અમેરિકાએ કોઈ દુશ્મન દેશના જહાજને ટોર્પીડોથી ડૂબાડ્યું છે.

શ્રીલંકાના વિદેશ મંત્રી Vijitha Herath એ સંસદમાં માહિતી આપતા જણાવ્યું કે 180 લોકોને લઈ જઈ રહેલું ઇરાની યુદ્ધપોત સંકટમાં હોવાની માહિતી મળતા જ બચાવ અભિયાન શરૂ કરાયું હતું. નૌસેના અને વાયુસેનાના જહાજો અને વિમાનોને તરત જ સ્થળ પર મોકલવામાં આવ્યા હતા. જ્યારે બચાવ દળો પહોંચ્યા ત્યારે જહાજનો કોઈ અંશ દેખાતો નહોતો, માત્ર તેલના ડાઘ અને લાઈફ રાફ્ટ નજરે પડ્યા હતા.

નૌસેના પ્રવક્તા કમાન્ડર બુદ્ધિકા સંપથે જણાવ્યું કે સમુદ્રમાં તરતા લોકો મળી આવ્યા હતા અને 32 લોકોને બચાવીને ગાલે શહેરની હોસ્પિટલમાં દાખલ કરાયા છે. આરોગ્ય મંત્રાલયના વરિષ્ઠ અધિકારી ડૉ. અનિલ જાસિંઘેએ જણાવ્યું કે બચાવાયેલા લોકોમાં એકની હાલત ગંભીર છે, સાત લોકો સારવાર હેઠળ છે અને અન્યને નાની ઇજાઓ પહોંચી છે. 87 મૃતદેહો સમુદ્રમાંથી બહાર કાઢવામાં આવ્યા છે અને તેમને જમીન પર લાવવામાં આવી રહ્યા છે.